नेपाली कांग्रेसका प्रमुख सचेतक रमेश लेखकले पीडामा परेका प्रधानमन्त्री पुष्पकमल दाहाल ‘प्रचण्ड’माथि टिप्पणी गरेर थप पीडा दिन नहुने बताएका छन् ।
शुक्रबार प्रधानमन्त्री दाहालले विश्वासको लिन बसेको प्रतिनिधिसभाको बैठकमा बोल्दै सांसद लेखकले पीडामा भएको मान्छेमाथि टिप्पणी गर्दा ज्यादा पीडित हुने भन्दै त्यतातिर नलाग्ने बताएका हुन् ।
उनले भने, ‘अधिकांश कुरामा मेरो असहमति छ, म कमसेकम आज प्रधानमन्त्रीजीले राख्नुभएको खण्डन, प्रतिवाद केही गर्ने वाला छैन, यसले थप कटुता उत्पन्न गर्छ, हाम्रो समाजले पीडामा भएको कुनैपनि मानिसका माथि थप टिप्पणी गर्नु भनेको ज्यादा पीडित गर्नु भएकाले त्यताति जान चाहन्न ।’
साथै, उनले दुई ठूला दल मिल्दा प्रतिपक्षी कमजोर नहुने बताए । ‘प्रधानमन्त्रीजीले प्रारम्भमै दुईवटा ठूला दलहरू मिल्दा प्रतिपक्षी कमजोर हुन्छ कि भन्ने चिन्ता गर्नुभयो, प्रधानमन्त्रीजी प्रधानमन्त्रीकै रुपमा उभिँदा प्रमुख प्रतिपक्षी दलको ठिक नेताको रुपमा देखेको हुँदा अब सदनमा कमजोर हुँदैन भन्ने लाग्छ,’ उनले भने ।
साथै, कांग्रेस प्रमुख सचेतक लेखले प्रधानमन्त्री दाहालले संविधान संशोधन गर्न दिइन्नँ भन्ने अभिव्यक्तिमा पनि संविधान कुनै पूजापाठ गरेर राख्ने किताब नभई समय अनुसार छलफल गरेर संशोधन गर्नुपर्ने बताए ।
