काठमाडौँ– शिक्षा विज्ञान तथा प्रविधि मन्त्रालयले शिक्षा दिवस मनाउन गरेको प्रस्ताव करिब सात महिनादेखि प्रधानमन्त्री कार्यालयमै थन्किएको छ ।
मन्त्रालयले दुई वटा विकल्पसहित प्रस्ताव पेश गरेको मन्त्रालयले जनाएको छ ।
तत्कालीन शिक्षा सचिव गोपीनाथ मैनालीका अनुसार तीनधारा संस्कृत पाठशाला स्थापना भएको दिन र राणाकालीन कानून (इस्तिहार) जारी भएको दिन मध्ये कुनै एक दिन शिक्षा दिवस मनाउने प्रस्तावसहित शिक्षा मन्त्रालयले प्रधानमन्त्री कार्यालयलाई पत्र पठाएको थियो । तर हालसम्म प्रधानमन्त्री कार्यालयबाट शिक्षा दिवसको विषयमा कुनै प्रतिक्रया आएको छैन ।
तत्कालिन प्रधानमन्त्री केपी शर्मा ओलीले उक्त प्रस्ताबमा निर्णय गर्ने बताए पनि मिति टुङ्गो लगाउन सकिएको थिएन । २०३१ साल फागुन १२ गते तत्कालीन राजा वीरेन्द्र शाहको राज्याभिषेकको अवसर पारेर सो मितिमा शिक्षा दिवस मनाउन थालिएको थियो ।
शिक्षा मन्त्रालयका अनुसार २०६२/६३ को आन्दोलनपछि २०६३ साल फागुन १२ गते शिक्षा दिवस मनाइएन र त्यसलाई २०६४ सालको अन्तर्राष्ट्रिय साक्षरता दिवसका दिन मनाउने निर्णय गरिएको थियो ।
सोही अनुरुप हरेक सेप्टेम्बर ८ अर्थात् भदौ २३ गतेलाई राष्ट्रिय शिक्षा दिवसका रुपमा पनि मनाउन थालिएको थियो । गत वर्ष तत्कालीन शिक्षामन्त्री गिरिराजमणि पोखरेलले साक्षरता दिवस र शिक्षा दिवस एकै दिन मनाउनु उपयुक्त नहुने भन्दै नयाँ मिति चयन गर्ने निर्णय गरेपछि अहिले शिक्षा दिवस मनाइएको छैन ।
