काठमाडौँ । सरकार र माध्यमिक विद्यालय शिक्षक युनियन नेपाल (हिस्टुन) बीच १६ बुँदे सहमति भएको छ कक्षा ११ र १२ को शिक्षा सुधारबारे विभिन्न माग राखेर विरोधका कार्यक्रम गर्दै आएको हिस्टुन र सरकारबीच सोमबार सहमति भएको हो ।
शिक्षा, विज्ञान तथा प्रविधिमन्त्री अशोककुमार राई र हिस्टुनका प्रतिनिधिबीच साधारण धार र प्राविधिक धारतर्फ हाल दिँदै आएको अनुदान कोटालाई दरबन्दीमा रूपान्तरण गर्ने, साविक उमावि कक्षा ११ र १२ मा अध्यापन गराउने शिक्षकहरूलाई माध्यमिक दितीय श्रेणीमा आन्तरिक प्रतिस्पर्धाबाट स्थायी गर्नेलगायतका बुँदा समेटिएका छन् ।
त्यस्तै सहमतिमा अस्थायी शिक्षण अध्यापन अनुमतिपत्रको म्याद सकिएमा सहज प्रक्रियाबाट स्थायी लाइसेन्सको व्यवस्था गर्ने, उमेरहदका कारण अवकास प्राप्त शिक्षकलाई राज्यबाट उपदानको सुविधा दिनेलगायत बुँदामा सहमति भएको हिस्टुनका अध्यक्ष टिकाप्रसाद न्यौपानेले जानकारी दिए ।
छलफलका क्रममा शिक्षामन्त्री अशोककुमार राईले संघीय शिक्षा ऐनमा कक्षा ११ र १२ लाई व्यवस्थित पार्ने विषय पनि थप हुने आश्वसन दिएका छन् ।
