पोखरा । नेकपा एमाले कास्की जिल्ला अध्यक्षमा मनबहादुर गुरुङ विजयी भएका छन् । निवर्तमान कार्यवाहक अध्यक्षसमेत रहेका गुरुङले ४५६ मत ल्याएर विजयी भएका हुन् । उनका प्रतिस्पर्धी दामोदर बैरागीले ४०७ मत पाएका छन् ।
शुक्रबारदेखि सुरु भएको जिल्ला अधिवेशनले सर्वसम्मत नेतृत्व चयन गर्न नसकेपछि गुरुङ र बैरागीले आ–आफ्नो प्यानलै बनाएर चुनावी मैदानमा होमिएका थिए । अध्यक्षमा विजयी भएका नेता गुरुङलाई नेकपा एमालेका केन्द्रीय उपमहासचिव पृथ्वीसुब्बा गुरुङको समर्थन रहेको थियो ।
त्यसैगरी पराजित भएका नेता बैरागीलाई भने संगठन विभाग प्रमुख खगराज अधिकारीको समर्थन थियो । उपाध्यक्षमा पनि पृथ्वीसुब्बा प्यानलका तेजनारायण अधिकारी ४२१ मत ल्याएर विजयी भएका छन । उनका प्रतिस्पर्धी बैरागी प्यानलका प्रभा कोइरालाले ४१३ मत ल्याएकी छन् ।
त्यसैगरी सचिवमा बैरागी प्यानलका बैनबहादुर क्षेत्रीले ४७५ मत ल्याएर विजयी भएका छन् भने प्रतिस्पर्धी विष्णुबहादुर केसीले ३ सय ६४ मत ल्याएका छन् । उपसचिवमा पनि बैरागी प्यानलका दर्शन लामाले (५४०) र नवराज ओझाले (४४३) मत पाएर विजयी भएका हुन् । एमाले जिल्ला अधिवेशनमा ९१९ जना प्रतिनिधिमध्ये ८९५ जनाले मतदान गरेका थिए ।
गण्डकीमा गुरुङ र अधिकारीको टकराव
उपमहासचिव पृथ्वीसुब्बा र संगठन विभाग प्रमुख अधिकारीको व्यक्तिगत स्वार्थका कारण गण्डकी प्रदेशका कास्की लगायतका अन्य जिल्लामा सर्वसम्मत रुपमा नेतृत्व चयन हुन सकेको थिएन ।
नेतृत्व छनोट गर्न दुवै समूहबाट ४ दिनसम्म पटकपटक छलफल हुँदासमेत सहमति नजुटेपछि मंगलबार मतदान भएको थियो । पार्टीमा दुवै ओलीनिकट भएपनि केन्द्रदेखि प्रदेश र स्थानिय तहसम्मको नेतृत्व चयनमा आपूm निकटको नेतृत्व चयनमा चासो राख्ने गरेका कारण उनीहरु प्रतिस्पर्धीका रुपमा देखिएका छन् । यस अघि भएको पोखरा महानगरको नेतृत्व चयनमा समेत नेताद्धय अधिकारी र गुरुङ हाबी हुँदा अधिवेशन तीन दिनसम्म लम्बिएको थियो ।
नेतृत्व चयनबारे विभिन्न टिकाटिप्पणी हुन थालेपछि नेता गुरुङपछि हटेका थिए । त्यसपछि अधिकारी निकट दिलिप न्यौपाने सर्वसम्मत अध्यक्ष भएका थिए । पार्टीको महाधिवेशन सकिएको झण्डै डेढ महिना पछि जिल्ला नेतृत्व चयन गर्न आयोजित अधिवेशनमा पनि उही पुरानै गुटगत रोग देखिएको छ ।
