गैँडाकोट । नेकपा एमाले गैँडाकोटका नेता रामचन्द्र धितालले एमाले गैँडाकोटको नगरअधिवेशनका लागि अध्यक्ष पदमा उम्मेदवारी घोषणा गर्नुभएको छ । गैँडाकोटमा भोली ११ गते हुने प्रथम नगर अधिवेशनमा अध्यक्षमा उम्मेदवारी दिने उहाँले बताउनुभयो ।
विखण्डनका विरुद्ध बलियो जनाधार, स्थानीय तह, एमालेको आधार भन्ने मुख्य नारा बनाई उहाँले प्रचार प्रसारलाई तिव्रता समेत दिनुभएको छ । उत्पादन तथा रोजगारसँग जोडेर आफ्ना एजेण्डा प्रस्तुत गर्दै उहाँले एमालेलाई अझ मजबुत गराउन आफ्नो उम्मेदवारी रहेको बताउनुभयो ।
२०३६ सालदेखी कम्युनिष्ट राजनीति शुरु गर्नुभएका धितालले विद्यार्थी संगठन अनेरास्ववियुदेखी आफ्नो राजनीतिक यात्रा अघि बढाउनु भएको हो । उहासँग साविक मुकुन्दपुर गाविसमा २०५४ सालदेखी २०६३ सालसम्मको एमाले पार्टीको गाउँ सचिवको अनुभव समेत रहेको छ । २०५५ देखि २०५६ सम्म नवलपरासी काठमाडौं सम्पर्क मञ्चको संयोजक, स्थानीय, क्षेत्र तथा जिल्लामा हुने पार्टीका हरेक गतिविधीमा सक्रिय सहभागिता जनाउँदै संगठन विस्तार तथा व्यवस्थापनमा महत्त्वपूर्ण जिम्मेवारी निर्वाह गर्दै आउनुभएको छ । उहाँ पार्टीको नवलपुर क्षेत्र नम्बर १ को क्षेत्रिय सदस्य समेत हुनुहुन्छ ।
अग्रजलाई सम्मान गर्दै उहाँले पार्टीको एकता र सुदृढिकरणका लागि सर्वसम्मत नभए मतदान हुने अवस्था नै आए मतदान गर्न समेत आग्रह गर्नुभएको छ ।
