मुम्बई । बलिउडमा सुन्दरतालाई अझ निर्खान कलाकारहरूले सर्जरीको सहारा लिने गरेको उदाहरण नयाँ होइनन् । अभिनेताका तुलनामा अभिनेत्रीहरू सुन्दर देखिनका लागि कैयौँ किसिमका सर्जरी गर्न माहिर छन् । शिल्पा शेट्टीदेखि श्रुति हासनसम्मका सेलिब्रेटीले कैयौँ सर्जरी गराएका छन् । उनीहरूले समय–समयमा यो कुरालाई स्वीकार्दै पनि आएका छन् ।
यो सूचीमा अभिनेत्री प्रियंका चोपडा पनि पर्छिन् । उनले करियरको सुरुआतमा नाकको सर्जरी गराएकी थिइन् । तर त्यो सर्जरी खराब बन्यो, जसकारण उनले कैयौँ फिल्म गुमाइन् । प्रियंकाले जुन समयमा नाकको सर्जरी गराएकी थिइन्, त्यसपछि उनको अनुहारमा अनौठो परिवर्तन देखियो । सर्जरी खराब भएपछि उनी डिप्रेसनमा गइन् । उनले एक अन्तर्वार्तामा करियरको त्यो समयको कुराकानी गरेकी थिइन्, जुन समयमा उनको करियर खराब भएको थियाे ।
प्रियंकाले केही समयअघि हावर्ड स्टर्नको रेडियो शोमा आफ्नो नाकको सर्जरीको बारेमा कुराकानी गरेकी थिइन् । उनले नाकमा रहेको मासुलाई हटाउनका लागि सर्जरी गराएको खुलाएकी थिइन् । ‘त्यो काम गरेपछि मेरो नाकको आकार बदलियो । जसकारण कैयौँ फिल्मबाट निकालिनु पनि प¥यो । त्यसपछि म डिप्रेसनमा गएँ र सबै कुरा छोडेर बरेलीमा फर्किने योजना बनाएको थिएँ’, उनले भनेकी छन् ।
प्रियंकाले यो सर्जरीपछि आफ्नो करियरमा ठुलो खराब असर परेको खुलाइन् । ‘कैयौँ निर्माताले मसँग काम गर्न मानेनन् । मलाई ३ वटा फिल्मबाट निकाले । म डिप्रेसनमा परेपछि बुबा पनि चिन्तित हुनुभयो । म पछि बुबाले करेक्टिव सर्जरी गराउनुभयो । बुबाले सर्जरी गराउनु भएपछि मेरो आत्मविश्वास फर्कियो’, प्रियंका भन्छिन् ।
प्रियंका लामो समयपछि फिल्म ‘वाराणसी’मार्फत बलिउडमा कमब्याक गर्दै छिन् । यो फिल्मका निर्माता तथा निर्देशक एसएस राजामौली हुन् । फिल्ममा महेश बाबुको पनि अभिनय छ ।
