राष्ट्रिय स्वतन्त्र पार्टीका सभापति रवि लामिछानेलाई उच्च अदालत तुलसीपुर, बुटवल इजलासले रिहा गर्न आदेश दिएको छ । बुटवलस्थित सुप्रिम सहकारीको रकम ठगी मुद्दामा पुर्पक्षका लागि थुनामा रहेका लामिछानेलाई न्यायाधीशद्वय वासुदेव आचार्य र तेजनारायण पौडेलको इजलासले बैंक जमानत स्वीकार गरी रिहा गर्न आदेश दिएको हो । आदेशमा भनिएको छ, ‘अदालतबाट फैसला हुँदा ठहरे बमोजिम हुने नै हुँदा साथै फैसलाले बिगोका हकमा थप दायित्व सिर्जना गरेमा तिर्न बुझाउन मजुर भए सोको कागज गरी प्रस्तुत मुद्दाको रोहबाट थुनामुक्त गर्नू ।’
सहकारीको रकम अपचलन मुद्दामा पुर्पक्षका लागि थुनामा रहेका लामिछानेले आफू कार्यरत रहेको संस्थामा सुप्रिम सहकारीबाट रकम प्रवाह भएको बिगोमध्ये दामासाहीले हुने बिगो बैंक ग्यारेन्टी राखी मुलुकी फौजदारी कार्यविधि संहिता, २०७४ को दफा ७१ अनुसार बैंक ग्यारेन्टी लिई मुद्दाको पुर्पक्ष गरिपाऊँ भनी माग गरेका थिए । सोही मागअनुसार लामिछानेले बचतकर्ताको बिगो प्राप्त गर्ने सुनिश्चितता गरेको देखिएकाले बचतकर्ता तथा लगानीकर्ताको रकम सुनिश्चितता नै पहिलो प्राथमिकता हुने ठहर गरी बैंक जमानत स्वीकार गरी मुद्दाको कारबाही अघि बढाउन उच्चको आदेश छ ।
बुटवलको सुप्रिम सहकारीको रकम अपचलन प्रकरणमा रविसहितका प्रतिवादीलाई १० करोड ९९ लाख ३६ हजार रुपैयाँ सामूहिक बिगो कायम गरेर अभियोगपत्र दायर गरिएको थियो । आफ्नो भागको बिगो रकम दाखिल गर्दा पनि जिल्ला अदालत रुपन्देहीले रिहा नगरेपछि भदौ ९ गते उच्च अदालतमा उनले निवेदन दर्ता गराएका थिए । लामिछानेले त्यसको ४ भागमध्ये आफ्नो भागमा पर्ने बिगो बराबरको २ करोड ७४ लाख ८४ हजारको बैंक जमानत निवेदनसाथ पेस गरेका थिए । लामिछानेले पेस गरेको उक्त बैंक ग्यारेन्टी सुरक्षित गर्ने आदेशमा उल्लेख छ । विदेश जानुपर्ने अवस्था आएमा लामिछानेले अदालतलाई जानकारी दिनुपर्नेछ । आदेशमा भनिएको छ, ‘व्यक्तिगत वा संस्थागत रूपमा विदेश यात्रा गर्नुपरे अदालतलाई पूर्वजानकारी दिने ।’
आज कारागार मुक्त हुने
आवश्यक कागजी प्रक्रिया पूरा गरेपछि मात्र रिहा हुने भएकाले लामिछाने बिहीबार छुट्न सकेनन् । आवश्यक कागजी प्रक्रिया मिलाएपछि उनी आज शुक्रबार मात्रै रिहा हुनेछन् । बिहीबार आदेश आउँदा कार्यालय समय सकिएकाले बाँकी प्रक्रिया शुक्रबार मात्र सुरु हुनेछ । लामिछानेलाई कारागारमुक्त गर्नका लागि जिल्ला अदालत र नख्खु कारागारबाटै बाँकीको प्रक्रिया पूरा गर्नुपर्ने हुन्छ ।
सुरुमा उच्च अदालतको आदेश जिल्ला अदालत रूपन्देही र जिल्ला अदालतबाट उक्त आदेश नख्खु कारागार पठाउनुपर्ने हुन्छ । त्यसपछि नख्खुु कारागारले लामिछानेलाई रूपन्देही जिल्ला अदालतमा पेस गर्ने र त्यसपछि मात्र लामिछाने रिहाइ हुनेछन् । यसका लागि शुक्रबार बिहान विमानमार्फत उनलाई भैरहवा लाने तयारी भएको रास्वपाका एक नेताले बताए ।
