मुम्बई । अभिनेता रणवीर कपूर र अभिनेत्री दीपिका पादुकोणले १० वर्षपछि स्क्रिन सेयर गर्ने भएका छन् । निर्देश्क अयान मुखर्जीको नयाँ फिल्ममा यो जोडीलाई दर्शकले हेर्न पाउनेछन् । राज कपूर र नरगिस अभिनीत सन् १९५६ को क्लासिक फिल्म ‘चोरी चोरी’बाट लिइएको कथाको फिल्ममा रणवीर र दीपिकाको अभिनय हुनेछ ।
रणवीर आफ्ना हजुरबुवा राज निर्देशित पुरानो क्लासिक फिल्मलाई आधुनिक शैलीमा निर्माण गर्ने योजनामा छन् । राज र नरगिस अभिनीत फिल्ममा धनी युवती र एक पत्रकारबीचको सम्बन्धलाई देखाइएको थियो । यो फिल्ममा रोमान्स, ह्युमर र सामाजिक सद्भावको मिश्रण थियो । नयाँ फिल्मले पुरानो फिल्मको कथासार नलिने भएको छ, तर यसको केन्द्र कथालाई वर्तमान समयअनुसार नयाँ तरिकाले प्रस्तुत गरिनेछ । जसमा आधुनिक चरित्र आर्क र अपडेट कथा हुनेछ ।
यो प्रोजेक्टका साथ रणवीर प्रख्यात आरके फिल्मस्को ब्यानरलाई पुनः सुरु गर्ने तयारीमा छन् । यो कदम पारिवारिक विरासतलाई पुनः बनाउने उनको निजी चासोका कारण भएको हो । रणवीर दुई कलाकार आलिया भट्ट र विक्की कौशलका साथ ‘लब एन्ड वार’मा व्यस्त छन् । उनी ‘रामायण’को सुटिङ पनि गरिरहेका छन् । यता दीपिका शाहरूख खानका साथ ‘किङ’को सुटिङ गरिरहेकी छन् । उनी एटलीको निर्देशनमा बनिरहेको एक फिल्ममा अल्लू अर्जुनका साथ पनि देखिँदै छिन् ।
