काठमाडौँ । पूर्वयुवराज्ञी हिमानी शाहले तेस्रो सातामा प्रदर्शनरत फिल्म ‘परान’ हेरेकी छन् । उनले सोमबार साँझ ८ बजे दरबार सिनेप्लेक्समा फिल्म हेरेपछि फिल्ममा नेपालको यथार्थ भेटिने बताइन् ।
‘अहिलेको अवस्थामा नेपालको यथार्थ यही हो । नेपालीहरू विदेश पलायन भइरहेको अवस्था छ । परान हेर्नेहरूले नेपालको यथार्थ भेट्नुहुनेछ,’ उनले भनिन् । शाह केही आफन्तका साथ फिल्म हेर्न आएकी थिइन् ।
शेखर गोल्छा र रन्जित आचार्यको निर्माण रहेको यो फिल्मले तेस्रो सातामा आइपुग्दा ११ करोड बढी ग्रस गरिसकेको छ । दीपकप्रसाद आचार्य निर्देशित फिल्ममा नीर शाह, मदनकृष्ण श्रेष्ठ, पूजा चन्द, केकी अधिकारी, प्रविण खतिवडा, अन्जना बराइली, महेश त्रिपाठी, बुद्धि तामाङलगायतको अभिनय रहेको छ ।
