निर्देशक यम शेर्पाको फिल्म ‘मिरमिरे’को २ वटा पोस्टर सार्वजनिक भएका छन् । सार्वजनिक पोस्टरमा फिल्मका प्रमुख कलाकारहरू दयाहाङ राई, प्रकाश सपुत, सिर्जना निङ्लेखु र साइसा गौचन छन् ।मधुरो प्रकाश र पहाडको पृष्ठभूमि राखिएको पोस्टरमा दयाहाङ र शाइसा छन् ।
उनीहरू बाबुछोरी हुन् कि भन्ने अनुमान लगाउन सकिन्छ । दुवैको अनुहारमा तनाव भाव छ । दोस्रो पोस्टरमा प्रकाश र सिर्जना छन् । प्रकाश विद्यार्थी र सिर्जना शिक्षिकाको भेषमा छन् । मन्द मुस्कानमा सिर्जना र मजाको हाँसोसहित प्रकाश देखिएका छन् ।
फिल्म १ माघमा रिलिज हुँदै छ । यार्सा फिल्म्सको प्रस्तुति रहेको फिल्ममा माओत्से गुरुङ, छुल्ठिम गुरुङ, भोलाराज सापकोटा तथा बालकलाकारहरू शाइसा गौचन, दिविशा पन्त, चिराग श्रेष्ठ र नमनराज गजुरेलको अभिनय छ ।दयाहाङ र प्रकाशको यो पहिलो सहकार्य हो ।
यमले भने दयाहाङसँग फिल्म ‘कार्साङ’पछि दोस्रोपटक सहकार्य गरेका हुन् । फिल्मको कथा पनि यमले नै लेखेका हुन् । फिल्ममा आलोक शुक्लाको छायांकन छ ।
निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको फिल्मका सह–निर्मातामा गोविन्द बोहरा, सुदीप कुँवर छन् । फिल्मको कार्यकारी निर्मातामा आरआर फिल्मसका सञ्चालकसमेत रहेका फिल्म वितरक रोहित कट्टेल छन् ।
