फिल्म ‘राम नाम सत्य’को छायांकन पूर्वी चितवनको रत्ननगरबाट सुरु भएको छ । झन्डै ८० प्रतिशत छायांकन चितवनमा हुने फिल्ममा म्युजिक भिडियो निर्देशक माइकल चन्दको डेब्यु निर्देशन छ । उनका अनुसार ४० दिन चितवनमा र बाँकी १० दिन मुस्ताङमा फिल्म खिचिनेछ ।
चितवनका प्रहरी प्रमुख एसपी गोविन्द पुरीले रत्ननगर जिरौनास्थित धर्मधाम कृष्ण मन्दिरबाट छायांकनको शुभारम्भ गरेका थिए । फिल्मका लाइन प्रोड्युसर राजेन्द्र आचार्यले फिल्मको छायांकन चितवनमा हुँदा चितवनलाई फिल्मसिटीको रूपमा चिनाउन र पर्यटन प्रवद्र्धनमा फाइदा पुग्ने बताए ।
यसै वर्षको २७ चैतमा रिलिज हुने फिल्ममा विराज भट्ट, सुशील श्रेष्ठ, आयुषसिंह ठकुरी, सुपुष्पा भट्ट, दिव्या रायमाझी, आशा पौडेल, खुसी कार्की, सुनिल थापा, प्रशान्त ताम्राकार, कनिज कोइराला, रवि गिरी, दिनेश डिसी लगायतका कलाकारहरूको अभिनय रहनेछ । फिल्ममा राजेन्द्र आचार्य, अर्जुन सुनार, रामेश्वर शाह, पुजन लामिछाने विशेष भूमिकामा देखिनेछन् ।
उपेन्द्र शाही र स्वेता विमली निर्माता रहेको फिल्ममा किशोर भट्ट र राजेन्द्र भट्ट कार्यकारी निर्माता, मोती कार्की क्रियटिभ निर्माता छन् । फिल्ममा मानकृष्ण महर्जनको डिओपी, श्री श्रेष्ठको एक्सन, अर्जुन पोखरेल, एसडी योगी, विमल गिरी र नवाज अन्सारीको संगीत छ । विजय बस्यालको पब्लिसिटी डिजाइन रहेको फिल्ममा विदुषी थापाको प्रोडक्सन डिजाइन रहेको छ । एक्सन, सस्पेन्स र प्रेमको जनरामा यो फिल्म निर्माण गरिनेछ ।
