मुम्बई । बिआर चोपडाको ‘महाभारत’मा ‘कर्ण’को भूमिकामा अभिनय गरेर घरघरमा चिनिएका अभिनेता पंकज धीरको ६८ वर्षको उमेरमा निधन भएको छ । उनको निधन बुधबार बिहान ११ः३० बजे क्यान्सरका कारण भएको हो ।उनको निधनको पुष्टि अभिनेता अमित बहलले गरेका थिए । अमितको ३ दशक बढी समयदेखि पंकजसँग घनिष्ट सम्बन्ध छ । उनले पुरानो साथीको निधनमा दुःख व्यक्त गरेका छन् । ‘३ वर्ष पहिले पंकज बिरामी थिए । तर उनले पूर्णरूपमा आफूलाई रोगमुक्त बनाएका थिए । उनी पुनः काममा फर्किएका थिए ।
करिब ४ महिना अघि मात्र उनीसँग मेरो कुरा भएको थियो । उनी ठिक थिए । तर उनको निधन भयो भन्दा म छक्क परेको छु । उनले तौल पनि घटाएका थिए र कुनै सिरियल या अर्को प्रोजेक्टमा काम गरिरहेका थिए’, अमितले भने ।‘महाभारत’मा ‘अर्जुन’को भूमिका निर्वाह गरेका फिरोज खानले आफूले एउटा राम्रा साथी गुमाएको बताए । ‘उनी राम्रो मान्छे थिए । म अहिले शोकमा छु र मलाई के भन्नुपर्छ भन्ने पनि थाहा छैन । उनी साँच्चै अद्भुत व्यक्ति थिए’, उनले भने ।
पंकजको निधनको केही घण्टाअघि उनका अभिनेता छोरा निकितन धीरले सामाजिक सञ्जालमा एक पोस्ट गरेका थिए, जुन निकै चर्चामा छ । उनले भगवान् शिवको तस्बिर राख्दै ‘जो आउँदै छन्, उनलाई आउन दिनु, जुन रहन्छ, त्यसलाई रहन दिनु, जो जान्छ, जान दिनु र भगवान् शिवको भक्त हुनुको नाताले अगाडि बढ्नु(निकै गाह्रो हुन्छ यस्तो गर्न)’ लेखेका छन् । समाचारअनुसार उनलाई केही वर्षअघि क्यान्सर भएको थियो । उपचारबाट क्यान्सर मुक्त भए पनि पुनः बल्झिएपछि त्यही क्यान्सरले उनी अस्ताए । उनी केही समयदेखि अस्वस्थ थिए ।
‘महाभारत’मा ‘कृष्ण’को भूमिका निभाएका अभिनेता नितिश भारद्वाजले सामाजिक सञ्जालमा १ पोस्ट लेख्दै पंकजप्रति श्रद्धाञ्जली व्यक्त गरेका छन् । उनले पंकजसँगको तस्बिर राख्दै ‘एक न एक दिन हामी सबैले यो संसारबाट जानै पार्छ, तर त्योभन्दा पनि बढी आवश्यक यो हो कि हामी यस्तो जीवन बाँच्न सकौँ, हामीलाई प्रेम र सम्मानका साथ सबैले हेरुन । टिम महाभारतले एउटा अनमोल रत्न गुमाएको छ । एउटा यस्तो कलाकार, जो संवेदनशील, मजबुत व्यक्तिवाला, उत्कृष्ट हाँस्ने र सुनौलो हृदयका थिए । भारतीय साहित्यिक धरोहरको पहिलो ‘एंग्री यंग मेन’ अब हामीमाझ छैनन्’ भन्दै लेखेका छन् ।
एक अन्तरवार्तामा पंकजले आफूलाई ‘महाभारत’मा अर्जुन चरित्रका लागि छनोट गरिएको किस्सा सुनाएका थिए । कलाकार छनोट समितिका सदस्य मासुम रजा, भृंग तुपकरी र पण्डित नरेन्द्र शर्माले एकमतले उनलाई अर्जुन चरित्रका लागि ‘फिट’ भन्दै सिफारिस गरेका थिए । तर बिआर चोपडाले उनलाई बृहन्नला(अर्जुनको नपुंसक अवतार)को भूमिका निभाउनुपर्ने र त्यसका लागि उनले जुँगा हटाउनुपर्ने सर्त राखेका थिए ।
तर पंकजले त्यसलाई अस्वीकार गरे । उनले आफ्नो अनुहार जुँगाकै कारण सन्तुलित देखिने र जुँगा नहुँदा अनुहार फेरिने भनेर अडान लिए । बिआर दुःखी हुँदै उनलाई ‘के तपाईं साँच्चै कलाकार हो ? यति ठुलो भूमिका केबल जुँगाकै कारण छोडिरहनुभएको छ ? भन्दै उनलाई कार्यालय बाहिर जान भनेका थिए ।उनले ‘सनम बेवफा’, ‘बादशाह’ जस्ता फिल्म र ‘चन्द्रकान्ता’, ‘ससुराल सिमरका’ जस्ता टेलिफिल्ममा अभिनय गरेका थिए । उनी निर्देशक पनि थिए । उनी ‘माइ फादर गडफादर’को निर्देशन गरेका थिए । उनले ‘एक्टिङ एकेडेमी’ पनि स्थापना गरेका थिए ।
