अभिनेत्री यामी गौतम ‘चुजी’ र दमदार अभिनयका कारण बलिउडमा चर्चामा आइरहन्छिन् । यी अभिनेत्री हाल एकसाथ ५ फिल्ममा काम गरिरहेकी छन् । जसमा एक फिल्म चाँडै रिलिजको तयारीमा छ ।
‘मैले ५ फिल्म लक गरिसकेकी छु । तीमध्ये १ फिल्म चाँडै रिलिज हुँदै छ । यो कुरा सुन्दा तपाईंलाई खुसी लाग्नेछ’, उनले भनेकी छन् । कन्टेन्ट–ड्रिवन फिल्मको समर्थक यानीका आउने फिल्महरू उत्तिकै दिलचस्पी र विविधायुक्त छन् । यसमा ‘तामसुर’ पर्छ । यो फिल्म शाहबानोको जिन्दगीमा आधारित बायोपिक हो, जुन फिल्म यही डिसेम्बरमा रिलिज हुँदै छ । फिल्ममा यामीसँगै इमरान हासमीको पनि अभिनय छ ।
यसबाहेक यामी सुपरहिट हाइस्ट थ्रिलर ‘चोर निकलके भागा’को सिक्वेल ‘चोर निकलके भागा–२’मा पनि कमब्याक गर्दै छिन् । फिल्मको कथा यसपटक १ क्रुज जहाजमा सेट गरिएको छ । जहाँबाट सस्पेन्स र एक्सनको कथा सुरु हुनेछ । यसको सुटिङ सन् २०२५ को अन्त्यसम्म हुनेछ ।
उनी आनन्द एल रायको फिल्म ‘नई नवेली’मा मुख्य भूमिकामा देखिँदै छिन् । यो एक हरर कमेडी फिल्म हो, जुन हाल प्री–प्रोडक्सनको एडभान्स स्टेजमा छ ।
