काठमाडौँ । भारतीय प्रतिस्पर्धीलाई हराउँदै नेपालका रवीन्द्र ढाँट म्याट्रिक्स फाइट नाइट (एमएफएन) बान्टमवेट च्याम्पियन बनेका छन् । शनिबार राति भारतमा भएको प्रतिस्पर्धामा रवीन्द्रले भारतका च्याम्पियन चुनरेङ कोरेनलाई पराजित गर्दै बान्टमवेट च्याम्पियन बनेका हुन् । रवीन्द्र एमएफएनको च्याम्पियन बन्ने पहिलो नेपाली फाइटर हुन् ।
ढाँटले तेस्रो राउन्डमा कोरेनलाई पराजित गरेका थिए । शक्तिशाली रेस्लिङ र आक्रामक पावरका लागि परिचित कोरेन ५ पटकको विजेता हुन् । उनी ‘दि इन्डियन राइनो’ उपनामले परिचित छन् । ढाँट मिक्स मार्सल आट्र्स (एमएमए) मा आक्रामक फाइटिङ र रेस्लिङको नामले परिचित छन् । यो जितसँगै रवीन्द्रको प्रोफेसनल रेकर्ड ८–१ पुगेको छ । रवीन्द्र बझाङको बित्थडचिर गाउँपालिकाका हुन् ।
यसैबीच, प्रधानमन्त्री केपी शर्मा ओलीले सामाजिक सञ्जालमार्फत् रवीन्द्रलाई बधाई दिएका छन् । ‘भारतका चुनरेङ कोरेनलाई हराउँदै रवीन्द्र ढाँट म्याट्रिक्स फाइट नाइट (एमएफए १७) मा बान्टमवेट च्याम्पियन बन्न सफल हुनुभएको छ । पहिलो पटक नेपाललाई उपाधि दिलाउन सफल रवीन्द्रलाई हार्दिक बधाई,’ प्रधानमन्त्रीले लेखेका छन् ।
