नयाँ दिल्ली । भारतीय क्रिकेट जगतले १ हप्ता भित्र २ ठुला झट्का बेहोरेको छ । रोहित शर्मापछि अब विराट कोहलीले टेस्ट क्रिकेटबाट सन्न्यासको घोषणा गरेका छन् । सोमबार उनले इन्स्टाग्राममा पोस्ट गर्दै यो जानकारी दिएका हुन् ।
पछिल्ला केही दिनदेखि मिडियामा चर्चा चलिरहेको थियो कि कोहलीले आफ्नो सन्न्यासको बारेमा बिसिसिआईलाई जानकारी गराएका थिए । बिसिसिआईले आगामी इंग्ल्यान्ड टेस्ट शृंखलालाई ध्यानमा राख्दै उनलाई आफ्नो निर्णयमा पुनर्विचार गर्न भनेको थियो ।
कोहलीले टेस्टबाट सन्न्यास लिने निर्णय गरे । यो भारतको लागि ठुलो झट्का हो किनकी बुधबार नियमित कप्तान रोहितले पनि टेस्टबाट सन्न्यास लिएका छन् । १ हप्ताभित्र २ महान खेलाडीको सन्न्यासले फ्यानहरू स्तब्ध छन् । यससँगै भारतीय टेस्ट क्रिकेटको एउटा अध्यायको अन्त्य भएको छ । भारतले अर्को महिना इंग्ल्यान्डको भ्रमण गर्ने तालिका छ । यस अवधिमा टोलीले ५ खेलको टेस्ट शृंखला खेल्नेछ ।
विराटले आफ्नो पोस्टमा लेखेका छन्, ‘१४ वर्षअघि मैले पहिलोपटक ब्यागी ब्लु जर्सी लगाएको थिएँ । इमानदारीपूर्वक भन्नुपर्दा, मैले कहिल्यै कल्पना गरेको थिइनँ कि यो ढाँचाले मलाई यस्तो यात्रामा लैजान्छ । यसले मलाई परीक्षा दियो, मलाई परिभाषित ग¥यो र मलाई जीवनभर साथमा बोक्ने पाठहरू सिकायो । सेतो जर्सीमा खेल्नु मेरो लागि एकदमै विशेष र व्यक्तिगत अनुभव हो । कडा परिश्रम, लामो दिनहरू, साना क्षणहरू जुन कसैले देख्दैनन् तर ती सधैँभरि तपाईंसँगै रहन्छन् । म यो ढाँचाबाट टाढा जाँदै गर्दा, यो सजिलो छैन, तर अहिले यो सही लाग्छ । मैले यसमा मेरो सबैथोक दिएको छु र यसले मलाई अपेक्षा गरेको भन्दा बढी दिएको छ । म खेलको लागि, मैदानमा रहेका मानिसहरूका लागि र यो यात्रामा मलाई साथ दिने सबैका लागि आभारी छु । म मेरो टेस्ट करियरलाई सधैँ मुस्कानका साथ फर्केर हेर्नेछु ।’
विराट आगामी दिनमा एकदिवसीय खेलमा मात्र खेल्ने देखिनेछन् । गत वर्ष भारतीय टोलीले टी–२० विश्वकप जितेपछि उनले टी–२० अन्तर्राष्ट्रियबाट सन्न्यास लिएका थिए । कुल मिलाएर, कोहलीले १२३ टेस्ट खेले र २१० इनिङमा ४६–८५ को औसतमा ९ हजार २३० रन बनाए । यसमा ३० शतक र ३१ अर्धशतक समावेश छन् ।
आफ्नो टेस्ट करियरमा कोहलीले कुल १ हजार २७ चौका र ३० छक्का प्रहार गरे । यसबाहेक, टी–२० अन्तर्राष्ट्रियमा, उनले १२५ खेलमा ४८ दशमलव ७ को औसत र १३७ शदमलव शून्य ५ को स्ट्राइक रेटमा ४ हजार १८८ रन बनाए । यसमा १ शतक र ३८ अर्धशतक पनि समावेश छन् ।एकदिवसीयमा, कोहलीले ३०२ खेलमा ५७ दशमलव ८८ को औसत र ९३ दशमलव ३५ को स्ट्राइक रेटमा १४ हजार १८१ रन बनाएका छन् । यसमा ५१ शतक र ७४ अर्धशतक समावेश छन् ।
