कावासोती । ‘फेक डकुमेन्ट’को सहारामा प्रधानमन्त्री केपी शर्मा ओलीविरुद्ध दुष्प्रचार गरेको अभियोगमा पक्राउ परेका विवादास्पद मेडिकल व्यवसायी दुर्गा प्रसाईंविरुद्ध विद्युतीय अपराध सजाय ऐनअन्तर्गत अनुसन्धान हुने भएको छ ।
प्रधानमन्त्री ओलीमाथि जघन्य आरोप लगाएको आरोपमा पक्राउ परेका उनीमाथि विद्युतीय अपराध सजाय ऐन (साइबर अपराध)अन्तर्गत अनुसन्धान हुने नेपाल प्रहरीको केन्द्रीय अनुसन्धान ब्यूरो (सीआईबी)का प्रवक्ता होबिन्द्र बोगटीले बताए ।
यसअघि प्रसाईंविरुद्ध जिल्ला अदालत काठमाडौंबाट साईबर अपराधमा पक्राउ पुर्जी जारी भएको थियो । प्रहरीले पक्राउ पुर्जी दिएरै प्रसाईंलाई नियन्त्रणमा लिएको सीआईबीले जनाएको छ ।उनलाई आजै भक्तपुरस्थित निवासबाटै पक्राउ गरिएको थियो ।
प्रसाई यसअघि असोज ६ गते पनि पक्राउ परेका थिए । सामाजिक सञ्जालमा एक महिलाको चरित्रहत्या गरेको उजुरीको आधारमा साइबर ब्युरोले उनलाई पक्राउ गरेको थियो । अदालतको आदेशपछि उनी धरौटीमा रिहा भएका थिए ।
