काठमाडौँ– प्रमुख प्रतिपक्षी दल नेकपा एमालेको विधान महाधिवेशनको मिति परिवर्तन गरिएको छ । शनिबार बसेको स्थायी कमिटी बैठकले विधान महाधिवेशनको मिति तय गरिएको सचिब योगेश भट्टराइले जानकारी दिए ।
उनले समय अपुग भएकाले यसअघि तोकिएको मिति परिवर्तन गरिएको बताए । उनका अनुसार विधान महाधिवेशन आगामी असोज १५ देखि १७ सम्म काठमाडौंमा हुने जानकारी दिए ।
स्थायी कमिटी बैठकले विधान महाधिवेशनमा सहभागी हुने प्रतिनिधिबारे पनि निर्णय गरेको छ । सचिब भट्टराईका अनुसार एमालेको विधानमा महाधिवेशनमा विधान परिषद्का सदस्यले भाग लिने व्यवस्था गरिएको भए पनि हाल सो परिषद् नभएकाले बाधाअड्काउ फुकुवामार्फत प्रतिनिधिबारे निर्णय गरिएको बताए ।
उनका अनुसार पार्टीको केन्द्रीय कमिटीका सबै पदाधिकारी र सदस्य, केन्द्रीय आयोगहरुका सबै पदाधिकारी र सदस्य, विभागबाट १५ जना, सबै जनवर्गी संगठनबाट १०–१० जना राष्ट्रिय सभा, प्रतिनिधिसभा र प्रदेशका सांसदहरु, प्रदेश कमिटीका पदाधिकारी र सदस्यहरु, जिल्ला कमिटीका पदाधिकारी र सदस्यहरु, प्रत्येक निर्वाचन क्षेत्रबाट एक महिला, एक पुरुष र एक दलित, स्थानीय तहका प्रमुख र उपप्रमुख तथा जिल्ला समन्वय समितिका प्रमुख र उपप्रमुख विधान महाधिवेशनका प्रतिनिधि हुनेछन् ।
यस्तै १० प्रतिशत प्रतिनिधिहरु केन्द्रीय कमिटीले मनोनित गर्नेसमेत व्यवस्था गरिएको छ । यी सबै गरी करिब ३ हजार प्रतिनिधिले महाधिवेशनमा भाग लिने सचिब भट्टराईले जानकारी दिए ।
विधान महाधिवेशन तयारीका विषयमा असोज ३ र ४ गते स्थायी कमिटी तथा ८ र ९ गते केन्द्रीय कमिटी बैठक बस्ने छ । यी बैठकले विधान संशेधनको मस्यौदा र अन्य प्रतिवेदनहरु पारित गर्नेछ ।
