नयाँ दिल्ली । राजस्थान रोयल्सका कप्तान सञ्जु सामसनलाई खेल शुल्कको ३० प्रतिशत जरिवाना गरिएको छ । मंगलबार अरुण जेटली स्टेडियममा दिल्ली क्यापिटल्सविरुद्धको खेलमा आईपीएलको आचारसंहिता उल्लङ्घन गरेको भन्दै सामसनलाई यो जरिवाना लगाइएको हो ।
सामसनलाई आचारसंहिताको धारा २.८ अन्तर्गत लेभल १ को अपराधको लागि दोषी पाइयो, जुन अम्पायरको निर्णयबाट असहमतिसँग सम्बन्धित छ। उनले दोषी स्वीकार गर्दै म्याच रेफ्रीको सजाय स्वीकार गरेका छन्।
होपको विवादास्पद क्याच
शाई होपले बाउन्ड्रीमा क्याच लिएपछि राजस्थानका कप्तान सामसन आउट भए । १६औँ ओभरको चौथो बलमा मुकेश कुमारले गुड लेन्थमा बल दिए, सामसनले लङ अनतर्फ सट खेले ।
त्यहाँ होपले क्याच लिए तर यस क्रममा उनको खुट्टा बाउन्ड्री नजिकै देखिन्थ्यो । तेस्रो अम्पायरले रिप्ले हेरे तर क्याचलाई क्लिन मानेर सामसनलाई आउट घोषित गरियो।
क्याच क्लिन घोषित भएपछि सामसनले अम्पायरसँग फिल्डरको खुट्टा बाउन्ड्री छोएको भन्दै बहस गरेको देखियो । तर, अम्पायरले उनलाई आउट करार गरेकाले स्यामसन पभिलियन फर्कनु परेको थियो। उनले ४६ बलमा ८६ रन बनाए ।
घरेलु मैदानमा टस हारेर पहिले ब्याटिङ गरेको दिल्लीले २० ओभरमा ७ विकेट गुमाएर २२१ रन बनाएको थियो । जवाफमा राजस्थानले २० ओभरमा ८ विकेट गुमाएर २०१ रन मात्रै बनाउन सकेको थियो । खेलमा सञ्जुको विकेट नै निर्णायक बन्यो ।
