मुम्बई । धूमका तीन सफल फ्रेन्चाइज फिल्मपछि यशराज प्रोडक्सनले चाँडै नै चौथो फिल्म धूम ल्याउने भएको छ । पठान, जवान र डंकीको चर्चामा रहेको यस फिल्ममा शाहरुख खानलाई मुख्य भूमिका दिने बताइएको थियो । तर, पछिल्लो रिपोर्ट अनुसार शाहरुख खानले अहिलेसम्म यो फिल्म साइन भने गरेका छैनन् ।
हालै फिल्म निर्माणसँग जोडिएको एक स्रोतले इन्डियन एक्सप्रेसलाई दिएको जानकारी अनुसार शाहरुखलाई धूम ४ मा साइन गरिएको छैन । उनले भने, ‘धूम ४ मा शाहरुखलाई कास्ट गरेको खबर गलत हो । अहिलेसम्म केही टुङ्गो लागेको छैन ।’
फिल्ममा शाहरुख खानसँगै साउथका सुपरस्टार रामचरण पनि महत्त्वपूर्ण भूमिकामा देखिने खबरहरू भारतीय सञ्चारमाध्यममा प्रकाशित छन् । धूम फ्रेन्चाइजीमा रामचरणले अभिषेक बच्चनको स्थान लिने दाबी गरिएको छ ।
बलिउड अभिनेता तथा निर्माता उदय चोपडा पछिल्लो ३ धूम फ्रेन्चाइजी फिल्मका हिस्सा रहेका छन् । हालै उदयले एक अन्तर्वार्तामा धूम ४ मा शाहरुख खान चोरको भूमिकामा उत्कृष्ट देखिने बताएका थिए । उनको भनाइलाई मानिसहरूले धूम ४ को कास्टिङतर्फ सङ्केतका रूपमा लिए र हल्ला चल्न थाले ।
धूम भारतीय सिनेमाको उत्कृष्ट फ्रेन्चाइजी मध्ये एक हो । धूम फ्रेन्चाइजीको पहिलो फिल्म सन् २००४ मा रिलिज भएको थियो, जसमा जोन अब्राहम, अभिषेक बच्चन, उदय चोपडाको महत्त्वपूर्ण भूमिका थियो। फिल्म धुम २ सन् २००६ मा रिलिज भएको थियो, जसमा ऋतिक रोशन, अभिषेक बच्चन, ऐश्वर्या राई, उदय चोपडाको महत्त्वपूर्ण भूमिका थियो ।
तेस्रो फिल्म धुम ३ २०१३ मा रिलिज भएको थियो, जसमा आमिर खानले दोहोरो भूमिका निर्वाह गरेका थिए। फिल्ममा उनीसँगै कट्रिना कैफ पनि मुख्य भूमिकामा थिइन् ।
