काठमाडौँ । पोर्चुगिज फुटबल स्टर क्रिस्टियानो रोनाल्डो हाल साउदी अरेबियाको घरेलु लिगमा ब्यवसायीक फुटबल खेल्छन् । ३८ वर्षीय स्ट्राइकर रोनाल्डो इङ्लिस प्रिमियर लिग क्लब म्यानचेस्टर युनाइटेडबाट साउदी क्लब अल—नासरमा आबद्ध भएका हुन् ।
अल—नासरले रोनाल्डोका लागि कीर्तिमानी रकम खर्च गरेको थियो । रोनाल्डोले हालसम्म विवाह गरेका छैनन् । उनी लामो समयदेखि आफ्नी प्रेमीकासँग बस्छन् । अर्जेन्टिनामा जन्मिएकी स्पेनिस सुपर मोडेल जर्जिना रोड्रिग्वेज रोनाल्डोकी प्रेमिका हुन् ।
विवाहअघि नै रोनाल्डो र जर्जिनाले सन्तान पनि जन्माइसकेका छन् । साउदीमा पनि रोनाल्डो र जर्जिना सँगसँगै बस्छन् । तर, साउदी अरेबियामा एउटा कानुन छ । उक्त कानुनले विवाह नगरी महिला र पुरुषलाई एकसाथ बस्ने अनुमति दिँदैन ।
विवाह नगरी महिला र पुरुष एकसाथ बसेमा त्यसलाई दण्डनीय अपराध मानिन्छ । तर, साउदी सरकारले रोनाल्डो र जर्जिनालाई भने यस विषयमा छुट दिएको छ । अर्थात रोनाल्डो र जर्जिना विवाह नगरी सँगै बस्दा पनि साउदी सरकारले यसतर्फ आँखा चिम्लिएको छ । समकालीन विश्व फुटबलका महान् खेलाडी रोनाल्डोले साउदी क्लब अल—नासरसँग दुई वर्ष ६ महिनाका लागि सम्झौता गरेका छन् । अल—नासरले यी स्टार स्ट्राइकरका लागि २० करोड युरो खर्चिएको थियो ।
रोनाल्डो ब्यवसायीक फुटबल खेल्न साउदी अरेबिया पुग्दा उनले आफ्नी प्रेमिकालाई पनि सँगै लगेका थिए । त्यसपछि धेरैको मनमा लागेको थियो, के साउदी सरकारले विवाह नगरी यी दुबैलाई एकसाथ बस्ने अनुमति देला त ? तर, धेरैको अनुमान विपरीत लामो समय बितिसक्दा पनि साउदी सरकारले यसतर्फ कुनै वास्ता गरेको छैन । साउदी कानुनका एक विज्ञ भन्छन्, ‘कानुनी रुपमा यो वर्जित कार्य हो । तर, रोनाल्डोको विषयमा साउदी सरकारले आँखा चिम्लने नीति लिएको छ ।’
यसको विपरीत साउदी क्लबले रोनाल्डो, उनकी प्रेमिका जर्जिया र बच्चाहरूको आवासका लागि भव्य सुविधा उपलब्ध गराएको छ । स्पेनिस सञ्चारमाध्यम ईएफईका अनुसार, साउदी सरकारले यी महान् खेलाडीलाई कानुनी कारबाही गर्ने कुनै सम्भावना छैन ।
‘उनी महान् खेलाडी हुन् । त्यसमाथि उनी विदेशी नागरिक हुन् । त्यसैले पनि साउदी सरकारले उनलाई कारबाही गर्ने सम्भावना देखिँदैन । तर, सरकारले चाहेमा उनलाई कारबाही गर्ने सम्भावना भने रहन्छ,’ स्पेनिस सञ्चारमाध्यमले भनेको छ ।
साउदीमा रोनाल्डो र जर्जिया सँगै बसे पनि उनीहरुले साउदी अरेबियाको संस्कृति र परम्पराको सम्मान गरेको दाबी पनि उक्त सञ्चारमाध्यमले गरेको छ । जर्जियाले साउदी अरेबियामा रहँदा त्यहाँको पोशाक सम्बन्धी नियमलाई पनि पूणर्रुपमा पालन गरेको समाचारमा जनाइएको छ ।
साउदी अरेबियामा महिलाले सार्वजनिक स्थलमा हिँड्दा हातको पाखुराभन्दा तलसम्म र खुट्टाको घुँडाभन्दा तलसम्म ढाक्ने गरी पोशाक लगाउनुपर्ने नियम छ ।
