माघ, काठमाडौँ । आज (शुक्रबार)बाट चलचित्र ‘ह्यारी कि प्यारी’ प्रदर्शनमा आएको छ । कलाकार जितु नेपाल र साम्राज्ञी राज्य लक्ष्मी शाहको मुख्य अभिनय रहेको यो चलचित्रलाई कलाकर्मिले सकारात्मक प्रतिक्रिया दिइरहेका छन् । गएको मंगलबार गरिएको प्रिमियरमा पनि अधिकांश कलाकारले खुलेरै प्रशंशा गरे ।
यस्तै आज प्रदर्शनको पहिलो दिनपनि केहि कलाकारले ह्यारी कि प्यारी हेरेर प्रतिक्रिया दिए । जहाँ राजेश हमाल, मनिषा कोइराला, करिश्मा मानन्धर लगायतका कलाकार थिए । उनीहरुले चलचित्र हेरिसकेपछि राम्रो लाग्यो भन्ने प्रतिक्रिया दिएर निस्किएका थिए ।
त्यतिकैमा चलचित्रका निर्देशक डा. कपिल रिजालले चलचित्र विकाश बोर्डका अध्यक्ष भुवन केसीले चलचित्र हेर्दिन भनेकाले निम्ता नगरेको बताए । बिकाश बोर्डका अध्यक्षलाई प्रिमियरमा पनि बोलाउनुभएको थियो, आज पनि बोलाउनुभएको थियो तर आउनुभएन भन्ने कुरा आएको छ खास कुरा केहो ? भन्ने एक सञ्चारकर्मिको प्रश्नमा निर्देशक रिजाल भन्छन्, ‘मैले उहाँलाई चलचित्र हेर्न आइदिनुस् भन्दा उहाँले आउँदिन भन्नुभो मैले निम्ता गरिन ।’
अभिनेता भुवन केसीले अभिनेत्री साम्राज्ञी राज्य लक्ष्मी शाहसँगको मनमुटावका कारण चलचित्र हेर्न नखोजेको प्रष्ट बुझिन्छ ।
भुवन र साम्राज्ञी बिचको बिषय केहो ?
केहिसमय अघि अभिनेत्री साम्राज्ञीले सामाजिक सञ्जाल इन्स्टाग्राममा एक भिडियो पोष्ट गर्दै चलचित्र क्षेत्रमा भोग्नुपरेको पीडा पोखेकि थिइन् । उनले ८ वटा चलचित्रमा काम गर्दा ३ चलचित्रको टिमबाट आफूलाई निकै शोषण भएको बताएकी थिइन् । आफूमाथि ती ठूला मानिएका ब्यानरले गरेको व्यवहार शब्दमा भन्न नसक्ने नै भएको साम्राज्ञीले बताएकी थिइन् ।
साम्राज्ञीले त्यहाँ कुन निर्माण पक्षले आफूमाथि शोषण गरेको भन्ने कुरा खुलाएकी थिइनन् तर, पनि साम्राज्ञीको अभिव्यक्ति डेब्यू चलचित्र ‘ड्रिम्स’ निर्माता/ निर्देशक भुवन केसीप्रति लक्षित भएको प्रष्ट हुन्थ्यो । साम्राज्ञीको उक्त अभिव्यक्तिमा भुवन केसीले उत्तर फर्काएका थिए ।
भुवनले साम्राज्ञीलाई अहिले पनि ‘ड्रिम्स’ को नाम बेचेर खाइरहेको उल्लेख गर्दै लेखेका थिए, ‘खान नपाएको भन्दै सामाजिक सञ्जालमा रोई कराई गर्ने हिरोइन अहिले कुन चलचित्रको नाम बेचेर खाइरहेकी छन् ? जुन थालमा खाने, त्यही थाल दुलो पार्ने ?’
त्यतिमात्र होइन अभिनेता भुवनले १० करोड रुपैयाँ क्षतिपूर्तिको माग दाबी गर्दै अभिनेत्री साम्राज्ञी शाहविरुद्ध काठमाडौं जिल्ला अदालतमा मुद्दा दायर गरेका थिए । भुवन र साम्राज्ञी बिचको आरोप प्रत्यारोप पछिल्लो समय रोकिएको छ । तर यी दुई कलाकार एकअर्कासँग बोल्दैनन् ।
