देवचुली ,
देवचुली नगरपालिकाले आज भाद्र १६ गते देखि २२ गते सम्म व्यवसाय दर्ता तथा नवीकरण शिविर सञ्चालन गर्ने भएको छ। नगरपालिकाले एक सूचना जारी गर्दै हाल सम्म दर्ता नभई सञ्चालन भएका र दर्ता भएर नवीकरण नभएका व्यवसायीहरूलाई मौकाको लाभ लिन आग्रह गरेको छ।
नगरपालिकाले देवचुली उद्योग वाणिज्य संघ तथा बजार व्यवस्थापन समितिसंगको सहकार्यमा उक्त शिविर सञ्चालन गर्न लागेको नगरपालिकाका सूचना अधिकृत कृष्ण सापकोटाले बताएका छन्।
नगरपालिकाले क्रमश आगामी भाद्र १६ गते फारम बजार , १७ गते रजहर बजार , १८ गते सीजी गेट , १९ गते मुण्डे र कुमसोत , २० गते धारापानी र गैँडी चोक , २१ गते प्रगतिनगर र पृथ्वीनगर चोक र २२ र २३ गते दलदले बजारमा शिविर सञ्चालन गर्नेछ।
यसको लागी उल्लेखित स्थानमा बिहान १० बजे देखि बेलुकी ५ बजे सम्म सम्पर्क गर्न सकिनेछ। व्यवसाय दर्ताको लागि नागरिकताको फोटोकपी १ प्रति , पासपोर्ट साइजको फोटो २ प्रति , व्यवसाय गर्ने घरको लालपुर्जा र नक्सापास प्रमाणपत्रको फोटोकपी १/ १ प्रति , भाडामा व्यवसाय गर्नेको हकमा घर धनी र व्यवसाय बिचको घर भाडा सम्झौताको फोटोकपी १ प्रति र नवीकरणको हकमा सक्कल प्रमाणपत्र र पछिल्लो पटक व्यवसाय नवीकरण शुल्क तिरेको रसिद लगायतको कागजातहरूको आवश्यकता पर्ने नगरपालिकाले जनाएको छ।
