सुवर्ण थापा निर्देशित फिल्म ‘द सिक्रेट अफ राधा’ को नयाँ २ पोस्टर सार्वजनिक गरिएको छ । सार्वजनिक नयाँ पोस्टरमा फिल्मका सम्पुर्ण कलाकारलाई स्थान दिइएको छ । यस अगाडि अभिनेत्री सृष्टि श्रेष्ठ मात्रै प्रचार सामाग्रीमा देखिँदै आएकी थिइन् ।
१० भदौमा रिलिज हुने फिल्म निर्देशक थापाले सौगात मल्लसँग मिलेर बनाएका हुन् । फिल्ममा सृष्टिका अलावा सौगात मल्ल, खगेन्द्र लामिछाने, मेनुका प्रधान, पशुपति राई, दिव्य देव पन्त, राजन खतिवडा, लोकेन्द्र लेखक, दयाहाङ राई, निश्चल बस्नेत, बुद्धि तामाङ लगायतका कलाकारको अभिनय छ । फिल्ममा रंगकर्मी सुनिल पोखरेल पनि अतिथि भुमिकामा छन् ।
आदियोगी भिजन, महारानी इन्टरटेन्मेन्ट युके, मन्डला अनलाइन र एएमआइ फिल्मस्को प्रस्तुती र मन प्रोडक्सनको एसोसिएनमा निर्माण र बिरजना इन्टरटेनमेन्ट तथा बिक्रमदास जोशी सह–निर्माता रहेको फिल्मको कथा निर्देशक थापाले लेखेका हुन् ।
नरेन्द्र मैनालीको छायांकन, निमेश श्रेष्ठको सम्पादन र कालीप्रसाद बाँस्कोटाको संगीत फिल्ममा छ । फिल्म प्रचारका लागि अभिनेता सौगातले अभिनयबाट तीन महिना विश्राम लिएको निर्माण युनिटले जनाएको छ ।
