३० वैशाखको स्थानीय निर्वाचन नजिकिँदै गर्दा विभिन्न कलाकर्मीहरूले आफू नजिकका राजनीतिक दललाई सघाउने उद्देश्यले गीत संगीत तथा कमेडी सार्वजनिक गरिरहेका छन् । यस्तैमा चर्चित हास्य कलाकार शिवशंकर रिजाल ‘जोगिन्दर’ ले पनि नेपाली काँग्रेसलाई चुनावमा सघाउने उद्देश्यले ‘काँग्रेसमा भोट किन ?’ हास्य ब्याङ्ग्य ल्याएका छन् ।
उनले सार्वजनिक गरेको ‘काँग्रेसमा भोट किन ?’ हास्य ब्याङ्ग्यमा रुखमा भोट हाल्न आग्रहदेखि काँग्रेसले पहिलेदेखि पछिल्लो समयसम्म गरेको कामको चर्चा समेत गरिएको छ । ४ मिनेट १५ सेकेन्डको हास्य ब्याङ्ग्य काँग्रेस निकट नेपाल सांस्कृतिक संघको युट्युव मार्फत सार्वजनिक गरिएको छ । नेपाल सांस्कृतिक संघका महामन्त्री समेत रहेका रिजालले ‘काँग्रेसमा भोट किन ? काँग्रेसलाई चुनावमा सघाउने उद्देश्यले बनाएको बताए ।
रिजाल पछिल्लो समय टेलिभिजनमा नयाँ कमेडी सो ‘जोगिन्दर मुखियाजी’ मार्फत चर्चामा छन् । उनले यस अगाडि निकै लोकप्रिय कमेडी सो ‘जोगिन्दर’ समेत चलाएका थिए । जोगिन्दर उपनामले परिचित रिजाल आफूलाई सबैले वास्तविक नामबाट भन्दा पनि जोगिन्दर उपनामबाटै चिन्ने बताउछन् ।
