नायिका झरना थापा चलचित्र ‘ए मेरो हजुर २’बाट निर्देशक बनिन् । यसपछि उनले ‘ए मेरो हजुर ३’ पनि निर्देशन गरिन् । उनै, झरना हिट चलचित्रको चौथो सिरिजका साथ दर्शकमाझ आउने तयारीमा छिन् । तर, ‘ए मेरोे हजुर ४’ रिलिजमा नआउँदै झरनालाई ‘ए मेरो हजुर ५’ कहिले बन्छ भन्ने प्रश्न आउन थालिसकेको छ ।
तर, नायिका थापाले अब ‘ए मेरो हजुर’को सिरिजमा केही समय ब्रेक लाग्ने संकेत गरेकी छिन् । उनले मिडियासँग भनिन्–‘पक्कै पनि ए मेरो हजुर ५ बन्छ । तर, त्यो भन्दा अगाडि भागवत गीता बन्छ ।’ झरनाका अनुसार, ‘भागवत गीता’ पनि प्रेम कथामा नै आधारित हुने बताइन् ।
‘ए मेरो हजुर’को आउँदो सिरिज नायक अनमोल केसी र नायिका सुहाना थापाविना कल्पना गर्न सक्नुहुन्छ भन्ने प्रश्नमा उनले भनिन्–‘पक्कै पनि सक्छु ।’
‘ए मेरो हजुर’को हरेक सिरिज उस्तै लागेको भन्दै नयाँपन अब प्रस्तुत नगर्ने भन्ने प्रश्नमा निर्माता सुनिलकुमार थापाले भने–‘हो, हामीले एउटै कुरा देखाइरहेका छौ । हामीले निरन्तर नेपाली चलचित्र नखिचिएका दृश्यमा हाम्रो चलचित्र खिचेका छौ । नेपालमा पहाड, हिमाल, खोला नै आकर्षण छन् । ती, दृश्यहरु देखाउँदा उस्तै लागेको हुनसक्छ । तर, यसले पर्यटकिय गतिविधिमा ठूलो टेवा पुर्याएको छ ।’
चलचित्र ‘ए मेरो हजुर ४’ वैशाखको १ गतेबाट रिलिज हुँदैछ ।
