काठमाडाैँ । पूर्वराष्ट्रपति विद्यादेवी भण्डारीले नेकपा एमालेको नेतृत्वले आफ्नो पार्टी सदस्यता अनुचित ढंगले रोकेको आरोप लगाएकी छिन् । बिहीबार सामाजिक सञ्जालमा स्टाटस लेखेर भण्डारीले आफूले दुई वर्षअघि नै विधानसम्मत ढंगले नवीकरण गरिसकेको पार्टी सदस्यतालाई नेतृत्वले अनुचित तरिकाले रोकेको कारण आफू महाधिवेशनमा भौतिक उपस्थिति हुन नसकेको बताइन् ।
उनले आफू उपस्थित हुन नसके पनि पार्टी परिवारको अभिन्न सदस्यको हैसियतले साथीहरूको साथमा रहने उल्लेख गर्दै ११औँ राष्ट्रिय महाधिवेशनको शुभकामना व्यक्त गरेकी छिन् । उनले लेखेकी छिन्, ‘नेपाल कम्युनिस्ट पार्टी (एमाले)को ११औँ राष्ट्रिय महाधिवेशनको पूर्वसन्ध्यामा पार्टी परिवारका सबै सदस्यहरूलाई हार्दिक शुभकामना दिन चाहन्छु । विद्यमान विषम राजनीतिक परिस्थितिको सामना गर्दै पार्टीलाई अग्रगतितर्फ अघि बढाउन यो महाधिवेशन पूर्ण रूपमा सफल हुनेछ भन्ने दृढ विश्वास व्यक्त गर्दछु ।’
महाधिवेशन पार्टीका नेता, कार्यकर्ता र सदस्यहरूका लागि नीति तथा नेतृत्व निर्माणमार्फत सामाजिक–आर्थिक रूपान्तरणतर्फ सिंगाे पार्टीलाई मार्गदर्शन गर्ने ऐतिहासिक अवसर भएकाले यो आमजनताको समेत महत्त्वपूर्ण सरोकारको विषय भएकाे उनकाे भनाइ छ ।
विशेष परिस्थितिका कारण निर्धारित समयावधिभन्दा एक वर्षअघि नै हुन गइरहेको महाधिवेशनमा वैचारिक तथा राजनीतिक रूपले परिपक्व नेता–कार्यकर्ता, ऊर्जाशील एवं अनुशासित युवा पुस्ता र विभिन्न क्षेत्रको सन्तुलित प्रतिनिधित्व सुनिश्चित हुने गरी महाधिवेशन प्रतिनिधि छनोटमा सम्पूर्ण पार्टी पङ्तिले उच्च जिम्मेवारीका साथ ध्यान दिनेमा उनले आशा व्यक्त गरिन् ।
‘सम्पूर्ण देशभक्त, राष्ट्रवादी र प्रगतिशील नेपाली जनताको आशा–भरोसाको केन्द्र तथा हाम्रो आस्था र विश्वासको धरोहर नेकपा (एमाले)को यो महाधिवेशन पूर्ण रूपले सफल होस् भन्ने अन्तरमनबाटै शुभेच्छा व्यक्त गर्दछु ।’
