मुम्बई । सन् २०२४ मा रिलिज भएको फिल्म ‘कल्की २८९८ एडी’ को सिक्वेलबाट अभिनेत्री दीपिका पादुकोण बाहिरिएकी छिन् । प्रभास, अमिताभ बच्चन, कमल हासन र दीपिकाको अभिनय रहेको फिल्मको पहिलो भागपछि दर्शकले सिक्वेलको माग गरिरहँदा दीपिका बाहिरिएको खबर सार्वजनिक भएको हो । नागा अश्विनको निर्देशनमा बनेको फिल्मको निर्माण कम्पनी वैजयन्ती मुभिजले दीपिका सिक्वेलबाट बाहिरिएको पुष्टि गरेको छ ।
‘यो आधिकारिक रूपमा घोषणा गरिन्छ कि दीपिका पादुकोण आगामी सिक्वेलको हिस्सा छैनन् । निकै सोच विचार गरेर हामी उनीबाट अलग्गिने निर्णय लिएका हौँ । पहिलो फिल्म बनाएको लामो यात्राको बाबजुद हामीले सहकार्य गर्न पाएनौँ । कल्कीको सिक्वेलका लागि धेरै समर्पणको आवश्यकता पर्छ । हामी दीपिकाको भविष्यका कार्यका लागि शुभकामना दिन्छौँ’, कम्पनीले जारी गरेको विज्ञप्तीमा भनेको छ ।
निर्माताका अनुसार दीपिका आफ्नो प्रतिबद्धतामा निश्चिन्त छैनन् । निर्माताको कुरालाई मान्ने हो भने दीपिका केही मतभेदका कारण फिल्मबाट अलग्गिएकी हुन् । यद्यपि हालसम्म दीपिकाको तर्फबाट कुनै कुरा बाहिर आएको छैन । यद्यपि केही समयदेखि दीपिका र निर्माताबीच रचनात्मक मतभेद र सुटिङको तालिकालाई लिएर मनमुटाव भइरहेको थियो ।
‘कल्की’ अघि दीपिकालाई ‘एनिमल’ निर्देशक सन्दीप रेड्डी वांगाले प्रभास स्टारर फिल्म ‘स्पिरिट’बाट निकालेका थिए । दीपिकाले राखेको माग निर्माताले मन नपराएपछि उनलाई निकालिएको सञ्चारमाध्यमले दाबी गरेका थिए । दीपिका आमा बनेपछि उनले व्यावसायिक र व्यक्तिगत जीवनका बीच सन्तुलन कायम राख्न ८ घण्टाको सुटिङको माग गरिरहेकी छन् । तर निर्माताले भने उनको मागमा चासो दिएका छैनन् ।
