ललितपुरस्थित नक्खु कारागार प्रशासनले जेन–जी युवा पुस्ताको आन्दोलनमा मौका छोपेर भागेका कैदीहरुलाई तुरुन्त सम्पर्कमा आउन अनुरोध गरेको छ । उक्त कारागारले एक नोटिस जारी गर्दै भागेका कैदीहरुलाई अविलम्ब सम्पर्कमा आउन अनुरोध गरेको हो ।
‘अतः विधि, कानुन र सामाजिक उत्तरदायित्वप्रति सम्मान प्रकट गर्दै तुरुन्तै यस कारागार प्रशासनसँग सम्पर्क स्थापना गरी आत्मसमर्पण गर्न र सार्वजनिक शान्ति तथा सुव्यवस्था कायम गर्न सक्रिय सहयोग पुर्याउन सम्पूर्ण फरार कैदीबन्दीहरुलाई यसै सूचना मार्फत औपचारिक रुपमा अपिल गरिन्छ,’ सूचनामा लेखिएको छ, ‘साथै सम्पर्क हुन नआएका बन्दीलाई कारागार ऐन २०७९ र अन्य प्रचलित कानुन बमोजिम भै जाने व्यहोरा अवगत गराइन्छ ।’
कारागारले कानुनी प्रक्रिया तथा विधिको पूर्ण परिपालना गर्न कारागार सार्वजनिक अपिलसमेत गरेको छ । जेनजी आन्दोलन हिंसात्मक बन्दै गएपछि कैदीबन्दीहरु नक्खु जेलबाट बाहिरिएका थिए ।
नक्खु कारागार प्रशासनले नै सूचना जारी गरी नक्खु कारागार परिसरबाट फरार भएका सम्पूर्ण बन्दीहरु (थुनुवा र कैदी) लाई सम्पर्कमा आउन भनेको छ ।
यदि नआएमा फरार अवस्थाको निरन्तरता हुने र कानुनले तोकेको सजाय थप कडाइका साथ कार्यान्वयन गरिने चेतावनी कारागार प्रशासनले दिएको छ ।
