गाेपी कृष्ण चापागाईं
काठमाडौँ। निर्माता तथा निर्देशक सन्तोष सेनले कलाकार दीपकराज गिरीको सोचमै पाप रहेको बताएका छन् । उनले सामाजिक सञ्जालमा एक पोस्ट गर्दै यस्तो आरोप लगाएका हुन् । दीपकले सामाजिक सञ्जालमा विभिन्न कमेन्ट गर्न लगाएर लाखौँ दर्शकको भावनासँग खेलबाड गरेको आरोप सेनको छ ।
सन्तोष सेन भन्छन् ‘दर्शककै मायाले तिमी आज यहाँसम्म आइपुगेका छौ । त्यसैले उनीहरूको भावनालाई कुल्चने अधिकार कसैलाई छैन’, सेन अगाडि भन्छन् ‘हाम्रो बलिदानको पोस्टमा आउने नकारात्मक कमेन्टहरू के तिम्रो समूहकै काम हो ?’
दीपकले नाम उल्लेख नगरी सेन प्रति लक्षित गर्दै आफ्नो सामाजिक सञ्जालमा एक स्ट्याटस पोस्ट गरेपछि सन्तोष रुष्ट बनेका हुन् । यसपछि गिरीको स्ट्याटस आफू प्रति भएको भन्दै यता सन्तोष सेनले गिरीको नाम नै उल्लेख गर्दै गालीगलौजपूर्ण लामो स्ट्याटस लेखका छन् ।
