रुपन्देही । रुपन्देही–३ मा हुने प्रतिनिधिसभा उपनिर्वाचनमा नेकपा (एकीकृत समाजवादी) ले उम्मेदवारका लागि ७ जनाको नाम सिफारिस गरेको छ । पार्टीको जिल्ला कमिटी रुपन्देहीको बैठकले महासचिव घनश्याम भुसालसहित ७ जनाको नाम सिफारिस गरेको हो । भुसाल यही क्षेत्रमा २०७४ सालमा नेकपा (एमाले) बाट प्रतिनिधिसभा सदस्यमा निर्वाचित भएका थिए ।
लुम्बिनी प्रदेश उपाध्यक्ष कमल भण्डारी, रूपन्देही जिल्ला अध्यक्ष हिराध्वज शाह, प्रदेश कमिटी सदस्य आनन्दप्रसाद गुप्ता, आशा चौधरी, थानेश्वर खरेल र रुपन्देही–१ को सह–इञ्चार्ज विजयलक्ष्मी रायको नाम सिफारिस गरिएको पार्टीले जनाएको छ ।
जिल्लाले पठाएको नामलाई उम्मेदवार छनोट गर्न बनेको कार्यदलले एक महिलासहित ३ जनाको नाम केन्द्रीय समितिमा सिफारिस गर्नेछ । पार्टीको केन्द्रीय उपमहासचिव तथा लुम्बिनी प्रदेश इञ्चार्ज मेटमणि चौधरी, केन्द्रीय सचिव तथा प्रदेश सह–इञ्चार्ज सोमप्रसाद पाण्डे, प्रदेश अध्यक्ष अब्दुल हुसेन खाँ, रूपन्देही जिल्ला इञ्चार्ज ई.नन्दलाल बन्जाडे र रूपन्देही अध्यक्ष हिराध्वज शाह सदस्य रहेको कार्यदलले ३ जनाको नाम पठाउनेछ ।
कार्यदलले सातै जनासँग छलफल गर्ने र चुनावी रणनीति बुझेपछि मात्रै ३ जनाको नाम सिफारिस गर्ने उपमहासचिव चौधरीले जानकारी दिए । रुपन्देही–३ मा आगामी १७ कात्तिकमा उपनिर्वाचन हुँदै छ ।
