काठमाडौँ । भनिन्छ, १२ वर्षमा खोलो फर्किन्छ । बेलायतको प्रख्यात वेम्बली एरिनामा शनिबार नेपाली सांगीतिक ब्यान्ड नेपथ्य खोला जसरी नै फर्किएको छ । गत शनिबार बेलुका १० हजार दर्शकमाझ नेपथ्य गुञ्जिरहँदा त्यहाँ उपस्थित अधिकांश दर्शकले १२ वर्षअघि सोही स्थानमा भएको नेपथ्यकै कन्सर्ट सम्झिएका थिए ।
निर्धारित समयमै सुरु भएको कन्सर्टमा नेपथ्यले पहिलो गीत ‘कोसीको पानी’ सुनाएको थियो । उसले कन्सर्टमा ‘आँगनैभरि’लाई छुटाएन । नेपथ्य स्थापनाभन्दा धेरैअघि ब्यान्डका गायक अमृत गुरुङले यो गीत कास्कीको याङ्जाकोटमा लेखेका थिए । त्यहाँ अमृतलाई बास दिने उनका बाल्यकालका साथी पुस्कल गुरुङ यस गीतको रचनाका साक्षी हुन् ।
स्वास्थ्यका कारण नेत्रज्योति गुमाउँदै गएका पुस्कल वेम्बली एरिनामा अमृतले गीत सुनाइरहँदा त्यही उपस्थित थिए । ‘गाउँमा आफ्नै अघिल्तिर गितार बजाउँदै अमृतले तयार पारेको यस गीतले झन्डै ३५ वर्षपछि पनि लन्डनको यस्तो भव्य समारोहमा मेरै सामुन्ने यति मानिसलाई मग्न बनाउला भन्ने त कल्पनामा पनि थिएन’, उनी भन्दै थिए ।
अन्तिम प्रस्तुति ‘रातो र चन्द्रसुर्जे’ प्रस्तुत गरेपछि ब्यान्ड मञ्चबाट बिदा हुने परम्परा भए पनि यहाँ भने अमृत ‘हिमाल चुचुरे’ सुनाएर बिदा भए ।
अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा नीरज गुरुङ, मादलमा शान्ति रायमाझी र किबोर्डमा दिनेशराज रेग्मीले साथ दिएका थिए ।
यसपटकको वेम्बली यात्रा बेलायतकै बिएसके इन्टरटेनमेन्ट र पर्चा प्रोडक्सनले आयोजना गरेको थियो । वेम्बली एरिनालगत्तै नेपथ्यले युरोपको शृंखला यात्रा गर्दै छ । त्यस क्रममा २३ अगस्टमा डेनमार्कको कोपेनहेगन, २७ अगस्टमा माल्टाको आटार्ड, ३१ अगस्टमा पोर्चुगलको लिस्बन हुँदै अन्तिममा ३ सेप्टेम्बरमा बेल्जियमको एन्थ्रोपेनमा प्रस्तुति दिएर नेपथ्यको यात्रा टुंगिनेछ ।
