काठमाडौँ । कवि उपेन्द्र सुब्बाको निर्देशनमा निर्माण भएको ब्लकबस्टर चलचित्र ‘जारी’को सिक्वल ‘जारी–२’ आगामी असोज ३ मा रिलिज हुने भएको छ । निर्माण पक्षले शुक्रबार ३ पोस्टरसँगै रिलिज मिति पनि सार्वजनिक गरेको हो ।
सार्वजनिक ३ पोस्टरमध्ये पहिलो पोस्टरमा चलचित्रका प्रमुख कलाकारहरू दयाहाङ राई, मिरुना मगर, बुद्धि तामाङ र विजय बराल अटाएका छन् । बाँकी २ पोस्टरमा दयाहाङ र मिरुना मात्र छन् । दयाहाङ र मिरुनालाई परम्परागत लिम्बू पहिरनमा देखाइएको छ ।
‘जारी–२ : सङ अफ च्याब्रुङ’ नाम दिइएको चलचित्र बाँसुरी फिल्म्स र कबड्डी फिल्म्सको ब्यानरमा निर्माण भएको हो । रामबाबु गुरुङ निर्माता रहेको चलचित्रमा दयाहाङ, मिरुना, विजय र बुद्धिसँगै ऋचा शर्मा, पुष्कर गुरुङ, प्रेम सुब्बा, माओत्से गुरुङ, मानहाङ लावती, विष्णु मोक्तान, कमलमणि नेपाल, अनिल सुब्बा, रेखा लिम्बू, बेदना राई र सिर्जना निङ्लेखुको अभिनय रहेको छ । २०८० सालमा रिलिज चलचित्र ‘जारी’ ले नेपाली बक्स अफिसमा १७ करोड माथिको व्यापार गरेको थियो ।
