हाँस्य टेलिसिरियल ‘भद्रगोल’का निर्माता तथा निर्देशक अर्जुन घिमिरे ‘पाँडे’को ‘डेब्यू’ निर्देशन रहने फिल्म ‘झरीपछिको इन्द्रेणी’को छायांकन बिहीबारबाट सुरु भएको छ । साउन १५ अर्थात् खीर खाने दिनको अवसर पारेर ललितपुरस्थित धन्तेरी बाराही मन्दिरमा फिल्मको मुहूर्त गरेसँगै छायांकन सुरु गरिएको हो ।
फिल्ममा गणेश उप्रेती, प्रियाना आचार्य, निर्मल शर्मा, रमेश उप्रेती, दीपाश्री निरौलालगायतको अभिनय रहनेछ । यो फिल्मबाट करिब ९ वर्षपछि कलाकार गणेश फिल्ममा कमब्याक गर्दैछन् । फिल्म काठमाडौँ, ललितपुर र भक्तपुरमा खिचिनेछ ।
पारिवारिक कथावस्तुमा निर्माण हुने फिल्मको छायांकन सेड्युल ४५ दिनको छ । फिल्ममा कुमार व्यञ्जनकार (कुमार बेन)को कथा तथा अर्जुन घिमिरे र विशाल घिमिरेको पटकथा छ । पशुपति शिवजी इन्टरटेन्मेन्टको ब्यानरमा निर्माण हुने फिल्ममा सुशील कडरियाको लगानी रहनेछ ।
फिल्ममा बुद्ध थापाको छायांकन, राष्ट्रिय स्वतन्त्र पार्टी(रास्वपा)का नेता गणेश कार्कीको गीत छ । निर्माण पक्षका अनुसार फिल्मको एक गीतमा काठमाडौँ महानगरपालिकाका मेयर बालेन शाहको ¥याप हुनेछ ।
