काठमाडौं । गायिका एलिना चौहानले सामाजिक संजालमा आफ्नो बारेमा अमर्यादित टिप्पणी गर्ने प्रयोगकर्तालाई सार्वजनिक गर्न थालेकी छन् । पोस्टमा नकारात्मक कमेन्टदेखि मेसेजमा अभद्र सन्देश पठाउनेको स्क्रिनसट् र लिंकसहित उनले धमाधम सार्वजनिक गरिरहेकी छन् ।
बुधबार बेलुका फेसबुकमा लाइभ आउँदै उनले ‘कमेन्टको अत्याचार’ बढी भएको गुनासो गर्दै पालैपालो पोस्ट गर्ने बताएकी थिइन् । उनले सार्वजनिक गरेका केही फेसबुक प्रयोगकर्ताले उनको यसअघिको दाम्पत्य जीवन र पूर्वश्रीमानबारे अभद्र टिप्पणी गरेको देखिएको छ । उनले यस्ता कमेन्ट गर्ने प्रयोगकर्तालाई सार्वजनिक गरेकी हुन् ।
‘कमेन्टको अत्याचार धेरै भयो । अब पालैपालो पोस्ट गर्छु । भाइरल हुन मन लाग्नेहरू आइज है’ उनले लेखेकी छन् । फेसबुक लाइभमा उनले अबदेखि आफूले सहन नसक्ने बताएकी थिइन् ।
यसअघि गायिका समीक्षा अधिकारी, टिकटकर प्रिन्सी–प्रिज्मा खतिवडादेखि अभिनेत्री ऋचा शर्माले पनि आफूविरुद्ध अमर्यादित टिप्पणी गर्नेको स्क्रिनसट् र लिंक सेयर गरेका थिए । पछिल्लो समय सामाजिक संजालमा हेट–स्पिच बढ्न थालेपछि कलाकारले धमाधम त्यस्ता प्रयोगकर्ताका एकाउन्टलाई सार्वजनिक गर्न थालेका छन् ।
