मुम्बई । बलिउड अभिनेता ऋतिक रोशन फिल्म ‘क्रिश–४’ मार्फत निर्देशनमा हात हाल्न लागेका छन् । यो कुराको घोषणा उनका बुबा राकेश रोशन आफैँले सामाजिक सञ्जालमा गरेका हुन् ।
निर्देशनको जिम्मेवारी अब छोरा ऋतिकलाई सुम्पिरहेको उनले बताए । फिल्म राकेश रोशन र आदित्य चोपडाले संयुक्त रूपमा निर्माण गर्ने बताइएको छ । राकेश रोशनले आफ्नो इन्स्टाग्राममा ऋतिक रोशनसँगको तस्बिर सेयर गरेका छन् । यसको क्याप्सनमा उनले लेखेका छन्, ‘२५ वर्ष पहिले मैले तिमीलाई अभिनेताको रूपमा लन्च गरेको थिएँ र २५ वर्षपछि म तिमीलाई निर्देशकको रूपमा लन्च गर्दैछु ।’
ट्रेड एनालिस्ट तरण आदर्शले पनि सामाजिक सञ्जालमा एक पोस्ट सेयर गर्दै ऋतिक रोशनले निर्देशनमा डेब्यु गर्ने कुराको पुष्टि गरेका छन् । उनले आफ्नो फिल्म ‘क्रिश–४’ बाट निर्देशनमा डेब्यु गर्नेछन् । यो फिल्म आदित्य चोपडा र राकेश रोशनले निर्माण गर्नेछन् ।
‘म क्रिश–४ को निर्देशन मेरो छोरा ऋतिक रोशनलाई सुम्पिरहेको छु, जसले यो फ्रेन्चाइजीको सुरुआतदेखि नै मसँगै यसलाई जिएका छन् । महसुस गरेका छन् र यसको सपना देखेका छन् । ऋतिकसँग दशकौँदेखि दर्शकहरूसँग कृषको यात्रालाई अगाडि बढाउने दृष्टिकोण छ । उनी हाम्रो परिवारका लागि धेरै अर्थ राख्ने फिल्मको निर्देशक बन्न लागेको देख्दा मलाई धेरै गर्व लागेको छ ।’ राकेश रोशनले भनेको भन्दै पिंकभिल्लाले समाचारमा भनेको छ ।
मिडिया रिपोर्टका अनुसार ‘क्रिश–४’ को स्क्रिप्ट तयार छ र यसको प्रि–प्रोडक्सनको काम तीव्र गतिमा भइरहेको छ । फिल्मको छायांकन अर्को वर्षको सुरुमा हुने बताइएको छ । ‘क्रिश–४ लाई आदित्य चोपडाले निर्माण गर्नेछन् । म धेरै खुसी छु कि उनी ऋतिकद्वारा निर्देशित हुन राजी भए ।’ राकेश रोशनले अगाडि भनेका छन् । राकेश रोशनले सन १९७० मा फिल्म ‘घर घर की कहानी’बाट अभिनेताको रूपमा आफ्नो करियर सुरु गरेका थिए ।
यस फिल्ममा उनी सहायक भूमिकामा देखिएका थिए । उनले अभिनेताको रूपमा धेरै कम चलचित्रमा काम गरेका छन् । यसपछि, १९८० मा उनले आफ्नै निर्माण कम्पनी खोले र सोही वर्ष फिल्म ‘आप के दिवाने’ बनाए । तर यो फिल्म बक्स अफिसमा ठुलो फ्लप सावित भयो । यद्यपि, यसबाहेक उनले ‘किङ अंकल’, ‘कोयला’, ‘कहो ना प्यार है’, ‘कोई मिल गया’, ‘करण–अर्जुन’, ‘क्रिश’ र ‘क्रिश–२’ जस्ता फिल्महरू निर्देशन गरेका छन् ।
