काठमाडौँ । दुई–दुई पटक राष्ट्रपति र उपराष्ट्रपति भएका विद्यादेवी भण्डारी र नन्दबहादुर पुन (पासाङ) पुनः सक्रिय राजनीतिमा फर्किने भएका छन् । पूर्वराष्ट्रपति भण्डारी पुनः एमालेमा फर्किएर राजनीति गर्ने तयारीमा छिन् भने पूर्वउपराष्ट्रपति पासाङ माओवादी केन्द्रबाट लगभग राजनीतिमा फर्किइसकेका छन् ।
बिहीबार बसेको माओवादी केन्द्रको स्थायी कमिटी बैठकमा पूर्वउपराष्ट्रपति पुन पनि सहभागी भएका छन् । हुन त यसअघिका पदाधिकारी र सचिवालय बैठकमा पनि पुन सहभागी भएका थिए । तर, ती बैठकमा सहभागी भएको तस्बिर सार्वजनिक भएको थिएन । तर, बिहीबारको बैठकमा सहभागी भएको तस्बिर भने माओवादीले नै सार्वजनिक गरेको हो । बिहीबारको बैठकमा उनी पार्टी सचिवहरूको लाइनमा बसेका थिए ।
पासाङ २०७२ देखि २०७९ सम्म २ कार्यकाल नेपालको दोस्रो उपराष्ट्रपति भएका पुनलाई माओवादीले पार्टी राजनीतिमा फर्काउन खोजेको छ । माओवादी पदाधिकारी बैठकले पुनलाई उपाध्यक्ष बनाउने निर्णय गरिसकेको छ । पदाधिकारी बैठकले विधान संशोधन गर्न वरिष्ठ उपाध्यक्ष नारायणकाजी श्रेष्ठको संयोजकत्वमा महासचिव देव गुरुङ तथा उपमहासचिवहरू वर्षमान पुन र जनार्दन शर्मा सदस्य रहेको कार्यदल बनाएको छ । २१ पुसदेखि बस्ने केन्द्रीय समिति बैठकमा संशोधित विधान पारित गरेर पुनलाई उपाध्यक्षमा मनोनीत गर्ने तयारी छ ।
पूर्वउपराष्ट्रपति पुन युद्धकालमा ‘जनमुक्ति’ (विद्रोही) सेनाका कमान्डर थिए । बिहीबारको बैठकमा पूर्वसभामुख कृष्णबहादुर महरा पनि सहभागी भएका थिए । पार्टी उपाध्यक्ष रहेका उनी सुन प्रकरणमा पक्राउ परेयता पार्टीमा निष्क्रिय थिए ।
उनीमात्र होइन, २ कार्यकाल नै राष्ट्रपति बनेकी विद्या भण्डारी पनि सक्रिय राजनीतिमा फर्किन गृहकार्य गरिरहेको बताइएको छ । उनले त एमाले पार्टीको नेतृत्वसमेत लिने चाहना राखेको र सोहीअनुसार अध्यक्ष केपी शर्मा ओलीइतर समूहलाई भेला पारिरहेको बताइन्छ ।
यसअघि एमालेबाट निष्काशित हुनुअघि नेता भीम रावलले पनि विद्या भण्डारीलाई पटक–पटक भेटेका थिए । रावलसँगको भेटमा अहिले नै कुनै निर्णय नलिन भन्दै थुम्थुम्याएकी थिइन् । तर, पूर्वराष्ट्रपति भण्डारीलाई भेटेको सुइँको पाएपछि एमाले अध्यक्ष ओलीले रावललाई एक्कासि पार्टीबाट हटाएको बताइँदै आएको छ ।
भण्डारी–ओलीबीच २ घन्टा छलफल
एमाले अध्यक्ष केपी शर्मा ओली र पूर्वराष्ट्रपति विद्यादेवी भण्डारीबीच बिहीबार २ घन्टा छलफल भएको छ । पूर्वराष्ट्रपति भण्डारीलाई भेट्न ओली उनको निवास बूढानीलकण्ठ पुगेका थिए । भेटमा विशेषतः एमालेमा पछिल्लो समय देखिएको ओलीविरोधी तप्का भण्डारी निकट भएको र त्यसले पार्टीमा गुटबन्दी बढ्ने भन्दै त्यसलाई रोक्न ओलीले आग्रह गरेको बताइएको छ । ओलीका पछिल्ला गतिविधि र नेताहरूलाई कारबाही गर्ने निर्णयप्रति पूर्वराष्ट्रपति भण्डारीले असन्तुष्टि जनाउँदै आएकी छिन् ।
