मुम्बई । सन्नी देओलको फिल्म ‘बोर्डर–२’ छायांकन अगावै विवादमा तानिएको छ । यो फिल्म सन् १९९७ मा रिलिज भएको ‘बोर्डर’ को सिक्वेल हो । सो चलचित्रसँग आवद्ध चलचित्र फाइनान्सर तथा वितरक भरत शाहले ‘बोर्डर–२’ का निर्मातालाई सार्वजनिक सूचना जारी गरेका छन् । फिल्मको पहिलो भागलाई लिएर अदालतमा मुद्दा चलिरहेको छ । यस सूचनामार्फत वकिल अजय खतलावाला र लिटिल एन्ड कम्पनीका साझेदार भरत शाह र बिना भरत शाह फिल्म ‘बोर्डर’ को विश्व अधिकारको नियन्त्रक रहेको बताए ।
उनले चलचित्रका निर्देशक तथा निर्माता जेपी दत्तसँग यो वार चलचित्रलाई आर्थिक सहयोग गर्ने सम्झौता गरेका थिए । पछि पार्टीबीच मतभेद उत्पन्न भएको हो । यसअघि नै फिल्मको कमाइ आधामा बाँड्ने निर्णय भएको थियो । यति मात्र होइन, जेपी दत्तले फिल्ममा खर्च भएको रकमको जानकारी पनि भरत शाहलाई दिनुपरेको थियो । उक्त नोटिसमा जेपी दत्तले भरत शाह र बिना भरत शाहलाई कहिले पनि कुनै जानकारी नदिएको र फिल्मको आर्थिक अवस्था र नाफाबारे पनि जानकारी नगरेको उल्लेख गरिएको थियो ।
यस्तो अवस्थामा अब भरत शाह र बीना भरत शाहले जेपी दत्तविरुद्ध भारतीय चलचित्र तथा टिभी निर्माता परिषद्मा उजुरी दिएका छन् । यसअघि सन् २०१४ मा उनले मुम्बई हाई कोर्टमा पनि पुगेका थिए । यो मुद्दा अहिले सिभिल कोर्टमा सरेको छ ।
केही महिनाअघि सन्नी देओल र जेपी दत्तले २७ वर्षपछि ‘बोर्डर–२’ बनाउने घोषणा गरेका थिए । यस फिल्ममा सनीसँग पहिले आयुष्मान खुराना देखिने थिए तर अहिले उनको ठाउँमा वरुण धवनले लिएका छन् । फिल्ममा सन्नी र वरुणबाहेक दिलजित दोसाँझ पनि देखिनेछन् । यो चलचित्रको छायांकन छिट्टै सुरु गर्ने तयारीमा छन् । यो फिल्म २३ जनवरी २०२६ मा थिएटरहरूमा रिलिज हुनेछ । गुलशन कुमार, टी–सिरिज र जेपी दत्तले संयुक्त रूपमा निर्माण गरेका हुन् ।
