लन्डन । आसन्न नेसन्स लिगका लागि घोषित इंग्लिस टोलीमा फिल फोडेल, कोले पाल्मर र वाले वाटकिन्सन अटाएका छैनन् । म्यानचेस्टरका फरवार्ड फाडेन हालै मात्रै पिएफए प्लेयर अफ द इयर घोषित भएका थिए । उनलाई इंग्ल्यान्डका प्रशिक्षक ली कार्सललीले चोटका कारण टोलीमा सहभागी नगराएका हुन् । चेल्सीका फरवार्ड पाल्मर र मिडफिल्डर वाटकिन्सन उनीहरूको क्लबको ड्युटीमा जाने कुरा त्यहाँको फुटबल एसोसिएसनले जारी गरेको विज्ञप्तिमा उल्लेख छ ।
७ सेप्टेम्बरका दिन डबलिनमा आयरल्यान्डसँग खेल्ने इंग्ल्यान्डले त्यसको ३ दिनपछि वेम्बलीमा फिनल्यान्डसँग खेल्नेछ । १४ जुलाईका दिन युरो फाइनलमा स्पेनसँग पराजयको सामना गरे यता टोलीको यो नै पहिलो खेल हो । सो खेलमा हारपछि गेराथ साउथगेटले राजीनामा दिएका थिए । उनको स्थानमा यु–२१ प्रशिक्षक कार्सललीलाई काम चलाऊ मेनेजर घोषित गरिएको हो ।उनले टोलीमा एन्जल गोमेज, टिभो लिभ्रामेन्टो, मोर्गान गिब्स ह्वाइट र नोनी माडुकेलाई टोलीमा बोलाइएको छ । लिलीका विङगर गोमेज, लिभरपुलका रक्षक लिभ्रेमान्टो, नटिङघम फरेस्टका मिडफिल्डर गिब्स ह्वाइट तथा चेल्सीका फरवार्ड माडुको कार्सलली यु–२१ मेनेजर हुँदा इंग्ल्यान्डको टोलीमा समावेश थिए । म्यानचेस्टर युनाइटेडका रक्षक हेरी माक्र्यु पनि टोलीमा बोलाइएका छन् ।
यसैगरी स्टार खेलाडी रोनाल्डो पनि क्रोएसिया र स्कटल्यान्डविरुद्धको नेसन्स कप फुटबलको टोलीमा समावेश भएका छन् । गत युरो कपका ६ खेलमा गोल गर्न असमर्थ उनलाई रोबर्टो मार्टिनेजले फेरी टोलीमा मौका दिएका छन् । साउदी अरेबियाको हल हिलालका लागि ४ गोल गरिसकेका उनले आक्रमणको भार नै थेग्ने अनुमान गरिएको छ । गोल्काल्मो रामोसले चोटका कारण यस खेल गुमाउने भएपछि रोनाल्डोमाथि थप जिम्मेवारी बढेको हो । पोर्चुगलका ४१ वर्षीय भेट्रान रक्षक पेपेले भने गत महिना सन्यासको घोषणा गरेका थिए ।
स्पोर्टिङ लिस्बनका १७ वर्षीय विङ्गर जियोभानी क्वेडालाई टोलीमा समावेश गर्दे मार्टिनेजले भविष्यको तयारी गरेका छन् । चेल्सीका बायाँ रेनाटो भेगा र लीलीका रक्षक टिएगो सान्टोस थप उदाहरण हुन् ।
पोर्चुगलको टोलीमा गोलरक्षक एफसी पोर्टोका गोलरक्षक डिएगो कोस्टा, उल्भ्सका जोसे सा र रियल बेटिसका रुइ सिल्भा छन् । यसै गरी, रक्षकहरूमा म्यानचेस्टर सिटीका रुबेन डियास, बेनफिकाका एन्टेनियो सिल्भा, स्पोर्टिङ लिस्बनका गोनकालो इनासियो, म्यानचेस्टर युनाइटेडका डिएगो डालोट, पेरिस सेन्ट जर्मनका नुनो मेन्डेस, र उल्भ्सका नेल्सन स्मेडो छन् ।
यसै गरी मिडफिल्डरहरूमा फुलहामका जाओ फालहिन्हा, पेरिस सेन्ट जर्मनका जाओ नेभेस र भिटिन्हा, म्यानचेस्टर युनाइटेडका ब्रुनो फर्नानडेज, म्यानचेस्टर सिटीका बर्नान्डो सिल्भा र अल हिलालका रुबेन नेभेस छन् । फरवार्डहरूमा चेल्सीका जओ फेलिक्स र पेड्रो नेटो, स्पोर्टिङ लिस्बनका फ्रान्सिस्को ट्रिन्काओ, स्पोर्टिङ लिस्बनका पेड्रो गोन्कालभेस, एसी मिलानका रायले निभाओ र लिभरपुलका डिएगो जोटा समावेस गरिएका छन् ।
गएको ओलम्पिकमा सानदार प्रदर्शन गरेका विङगर माइकल ओलिसे फ्रान्सको राष्ट्रिय टोलीमा समावेश गरिएका छन् । नाइजेरियन बाबु र फ्रेन्च अल्जेरियन आमाबाट लन्डनमा जन्मिएका उनी पछिल्लो समयका हेर्न लायक खेलाडीको रूपमा स्थापित छन् । थिएरी हेन्रीको प्रशिक्षणमा रहेको फ्रान्सेली ओलम्पिक टोलीमा रहँदा उनको प्रदर्शन सानदार थियो । उनी हालसालै क्रिस्टल प्यालेसबाट जर्मन क्लब वायरन म्युनिखमा ६० मिलियन युरोमा अनुबन्ध भएका छन् ।
गत प्रिमियर लिगमा उनले १९ खेलमा १० गोल गरे । फ्रान्सेली टोलीका प्रशिक्षक डिडियर डे्सक्याम्पले उनले गत ओलम्पिकमा सानदार प्रदर्शन गरेकै कारण राष्ट्रिय टोलीमा बोलाइएको बताएका छन् ।
