काठमाडौँ । आगामी फूलपातीबाट नेपालमा रिलिजको तयारीमा रहेको फिल्म ‘हरिबहादुरको जुत्ता’ अमेरिकाका ८० सहरमा प्रदर्शन हुने भएको छ । चलचित्र इन्टरटेनमेन्ट एलएलसीले फिल्मलाई अमेरिकाका ८० सहरमा रिलिज गर्न लागेको हो । यो संस्था फिल्म वितरक उज्ज्वल पौडेलका छोरा आहानको हो । आहानले यही फिल्ममार्फत फिल्म वितरणमा डेब्यु गरेका हुन् ।
टेक्सासमा बस्दै आएका आहानका अनुसार फिल्मलाई त्यहाँको बक्सअफिसमा रिलिज गरिनेछ । उनले टेक्सास, न्युयोर्क, ओहायो, पेन्सिलभेनिया, कनेक्टिकट, न्यु ह्याम्सायर, मासाचुसेट्स, नेब्रास्का, जर्जिया, मिजौरी, विसकन्सिन, नर्थ डेकोटा, मिनेसोटा, आयोवा, मेरिल्यान्ड, वासिंगटन डिसी, भर्जिनिया, उटाहलगायतका सहर र राज्यमा फिल्म रिलिज गरिने बताए ।
‘यहाँको सिनेमार्क, सिनेपोलिस, रेगल सिनेमाज, मार्कस सिनेमाज र एप्पल सिनेमाजलगायतका चेनमा पनि फिल्म रिलिजको तयारी भइरहेको छ’, उनले भने । दीपेन्द्र के खनालको निर्देशन तथा सरोज ओली र मोहितवंश आचार्यको निर्माण रहेको फिल्ममा हरिवंश आचार्य, प्रियंका कार्की, स्वस्तिमा खड्का, प्रकाश सपुतलगायतका कलाकारको अभिनय छ ।
